Nadungagan og duha ang usa lang unta ka positibo sa coronavirus disease kun Covid 19 sa sityo Zapatera, brgy. Luz, dakbayan sa Sugbo.
Ang Zapatera, nga labing dakong sityo sa brgy. Luz nga gipuy-an sa 9 mil tawo, daan nang gipaubos sa lockdown dihang usa kanila ang nagpositibo sa virus niadtong Abril 7.
Tungod niini, walay usa sa mga nagpuyo sa sityo ang makagawas ug wala usay makasud sa lugar.
Subay niini, anaa ra sa mga kawani ug boluntaryo sa barangay ang pagtabang nga mahatagan sa batakang panginahanglan ang katawhan sama sa pagkaon ug uban pa.
Sumala pa ni Kagawad Maynard Salinguhay, iya nang gisultihan ang mga residente nga ilista lang ang ilang mga gikinahanglan kay ang mga barangay workers ug volunteers nay mopalit alang kanila.
Segun sa rekord, adunay 15 ka sityo ang Brgy. Luz nga gipuy-an sa kapin sa 18,000 ka tawo basi sa 2015 census sa Philippine Statistics Authority (PSA).
Midugang si Salinguhay nga giaporan na og mga pinutos nga pagkaon ug ubang relief goods gikan sa siyudad ug pribadong indibiduwal ang mga mulupyo nga molanat hangtod sa Abril 18.
Apan sa milabayng adlaw, gipahibawo sa City Health Department (CHD) ang duha ka bag-ong kaso sa Covid 19 sa ilang dapit busa nangayog dugang hinabang ang kadagkoan sa barangay sa kagamhanang lokal.
Gipadugangan usab nilag polis ang sityo para pag-imponer sa locdown ug mandatory home quarantine.