Hugot nga gimandu karon sa Gensan City IATF kon Inter-Agency Taskforce on Covid 19 gipangunahan ni Mayor Ronnel Rivera ang pagpahugot sa pagbantay sa utlanan kon tightened border security aron masiguro nga dili makasulod ug mokuyanap ang virus sa Covid 19.
Kini ang iyang kamanduan sa kapulisan sa tanang mga boundary pasulod sa Gensan ug dili na pasudlon ang mga non essential kon mga tawo nga walay klarong katuyuan sa pag –anhi sa Gensan.
Gitawag kini sa pipila ka mga tawo nga border lockdown aron malimitahan ang kalihokan sa mga tawo karon nga adunay gidudahang local transmission sa Covid 19 sa mga silingan nga probinsiya susama sa Sultan Kudarat, South Cotabato ug Cotabato City .
Karong adlawa pipila sa mga motorist gikan sa South Cotabato ang nagpila sa boundary sa Apopong ug Sinawal highway ug kapin duha ka oras samtang ang pipila ka mga tawo wala gyud tuguti nga makasulod sa Gensan ug gipabalik sa gigikanan.
Mao usab ang sitwasyon sa boundary sa Sarangani sa Tinagacan ug Katangawan Checpoints , Buayan ug Barangay Bawing ug ang mga essential workers ug essential goods nga gisakay sa mga trucks nga adunay mga food pass ang maoy gitugutan nga makasulod sa mga boundary pasulod sa Gensan.
Samtang gipatuman ang localized lockdown sa zone 7 barangay Bula Gensan human nga adunay gikataho nga usa ka babaye 62 anyos nga nagpositibo sa Covid 19 ug naa na karon sa usa ka pribadong balay tambalanan.
Gilayong gi-meeting sa IATF gipangunahan ni City Administrator Atty. Arnel Zapatos ang mga opisyal sa Barangay Bula ug mga BCCF kon Barangay Covid 19 Control Force gipangunahan ni Kapitan Nicanora Vargas alang sa paghimo ug lakang sa contact tracing sa mga tawong posibling nakasalamuha sa maong babaye nga positibo sa Covid 19 .
Wala pa hinuon gikumpirma sa IATF Gensan kon local transmission ba kaha ang maong natakdan sa Covid 19 apan wala matud pay travel history ang nasampit ug dili usab kini LSI kon Locally Stranded Individual ug kaha ROF kon Returning Overseas Filipinos.
Nanawagan karon ang Mayor nga mag stay at home kon walay klarong katuyuan mogawas sa balay ug muadto sa downtown ug kanunay motuman sa mga safety protocols kon pagamit ug facemask , face shields , sanitizer kon alcohol ug pag obserbar ug social distancing. (Roniel Degorio, RPN DXDX Gensan)
(Photo courtesy of PIA XII – Soccsksargen)