Suportado sa local business community sa GenSan ang pagpatuman sa citywide nightly curfew ug liquor ban, taliwala sa padayong bahad sa Covid-19 pandemic.
Sa usa ka pamahayag, giasoy ni General Santos City Chamber of Commerce and Industry, Inc. vice president Ben Claudio nga ilahang nasabtan ang tumong ug maayong katuyuan sa LGU, sa pagpatuman sa maong health measures.
Gatuo usab ang opisyal nga dili maapektuhan og dako ang mga establisyemento nga tig-baligya og mga ilimnong makahubog, gumikan sa limitado lamang ang liquor ban, sulod sa gitakdang 12:00 MN – 4:00 AM curfew.
“Sa akong tanaw, mao man pud ang atong curfew from 12 MN – 4:00 AM, mao pud ang liquor ban, but prior to that hour, wala man tay liquor ban,” ang tipik sa pamahayag sa opisyal.
Una nang giatasan ni General Santos City Mayor Ronnel Rivera ang City-PNP sa istriktong pagpatuman sa nightly curfew sa tibuok siyudad, asa magsugod gikan alas-12:00 sa gabii hangtud alas-4:00 sa sayong kabuntagon.
Sa bagong gipagawas nga Executive Order No. 13 sa city government, gimando na usab ang pagbawal sa pagbaligya sa mga ilimnong makahubog sulod sa maong curfew hours.
Gawas niini, gimanduan usab sa LGU ang nagkadaiyang mga barangay nga imonitor ug bantayan ang nagkadaiyang mga business establishments sa ilahang areas of responsibility aron hingpit nga mapatuman ang bagong health measures, taliwala sa padayong bahad sa Covid-19.
“Curfew hours shall be at 12 MN up to 4 AM the next day, provided that all night establishments, who are allowed to open until curfew hours can serve only their customers prior to 12 MN. All establishments serving liquors shall not be allowed to sell liquors during curfew hours,” ang tipik sa maong bagong executive order. (John Rey Somido)