Banga, South Cotabato – Gunit na karon sa mga awtoridad ang usa sa upat ka mga suspek sa pagpamusil sa usa ka pulis sa Brgy. Liwanay, Banga, South Cotabato, niadtong Nobyembre 29, 2023.
Giila ang dinakpan nga suspek nga si alyas “Arnie”, hingkod ang panuigon, minyo ug residente sa T’boli, South Cotabato.
Kahinumduman nga bandang alas-8 sa gabie dihang gipusil ang biktima nga si Police Executive Master Sargeant (PEMS) Jerico Tambanillo Magbanua nga nakabase sa Surallah Municipal Police Station kung asa nakaangkon kini ug igo pinusilan sa bala sa iyang tiyan..
Paspas nga nagpahigayon ug hot pursuit operation ang mga sakop sa Surallah MPS, T’boli MPS, 2nd SCPMFC ug uban pang operatiba sa South Cotabato Police Provincial Office nga miresulta sa pagkasikop sa usa sa upat ka mga suspek sa Purok Saging, Barangay Poblacion, Tboli, South Cotabato.
Sa karon, kasamtangan pa gihapon nga ginatambalan ang biktima samtang nagpadayon pa ang ginahimong operasyon sa kapulisan para madakpan ang uban pang mga kaubanan sa suspek. (Rey Ombana, photo courtesy of Soccsksargen PCADG)