General Santos City – Dungan nga gipahigayon karong adlawa ang programa sa PDEA nga “OPLAN HARABAS” sa tibuok nasud Pilipinas. Ilawom sa maong programa, nagpahigayon ug Random Drug test sa mga drivers sa mga public Utility Vehicle sa mga terminal sa pampublikong sakyanan sa tibuok nasud.
Kaabag sa PDEA ang buhatan sa LTO, DOH, LTFRB, CADAC ug PNP sa pagpahigayon sa maong aktibidad.
Matud ni Kath Abad, Tigpamaba sa PDEA-Regional Office 12 nga ang maong programa parte sa pagpangandam sa Semana santa diin gilauman ang pagdagsa sa mga pasahero nga mo-uli sa tagsa nila ka probinsya. Nag-unang tumong sa programa nga masigurong walay mga drivers nga positibo sa droga aron luwas nga makauli ang mga pasahero sa ilang mga lugar.
Nasayran nga gawas sa Random Drug Test sa mga drivers, nagpahigayon usab sila ug K-9 Inspection diin adunay mga narcotic dogs nga nagatuyok sa mga terminal aron i-check ang mga bagahe sa mga pasahero ingon man sa mga pampublikong sakyanan. Nangkatag usab sila ug leaflets diin nakalatid dinhi kung unsay mamahimong epekto sa illegal drugs sa lawas sa tawo.
Nasayran nga dinhi sa GenSan ang Oplan Harabas ang gipahigayon sa Bulaong Terminal samtang sa Koronadal City gipahigayon kini sa Koronadal Public Terminal.
Dugang pagbutyag ni kath Abad nga gihimong simultaneous ang pagpahigayon sa maong aktibidad aron kung dili makapa-drug test ang usa ka driver sa gigikanan niining terminal, mamahimo gihapon kining makapadrug test sa iyang padulngan nga terminal.
Nasayran nga sa mga nakalabayng tuig, napahigayon na usab sa PDEA ang maong programa isip kabahin sa ilang prepapasyon sa Semana Santa.
(Source: PDEA-Regional Office 12)