Ang Sarangani Province nakapasar sa 2024 Seal of Good Local Governance (SGLG) Regional Assessment, sumala sa gipahibalo ni Musarapha A. Alim, Hepe sa Local Government Monitoring and Evaluation Division sa Department of the Interior and Local Government (DILG) Regional Office XII.
Kini human gipahigayon ang regional assessment, Hunyo 11, 2024 alang sa naasoy nga katuyo-an.
Si Alim, kinsa nangulo sa regional assessment team, mideklarar usab sa rekomendasyon sa team sa Sarangani Province alang sa umaabot nga national validation sa SGLG.
Sa mahinumduman, ang Sarangani Province nakadawat sa prestihiyosong National SGLG Award sa miaging tuig.
Si Gobernador Rogelio D. Pacquiao mipadayag og paglaom nga maangkon na usab ang pasidungog karong tuiga.
Gihatagan niya og gibug-aton ang kamahinungdanon sa SGLG sa pagsagop sa labing maayo nga mga gawi sa pagdumala ug pagpakita sa dili matarug nga pasalig sa provincial local government unit (PLGU’s) sa “excellence, transparency, and accountability in public service.”
Ang assessment team nag-evaluate sa PLGU sa nagkalain-laing mga governance areas, lakip na ang Financial Administration and Sustainability, Disaster Preparedness, Social Protection and Sensitivity, Health Compliance and Responsiveness, Sustainable Education, Business-Friendliness and Competitiveness, Safety, Peace and Order, Environmental Management, Tourism, Pag-uswag sa Kabilin, Kultura ug Sining, ug Pag-uswag sa Kabatan-onan.
Si Provincial Administrator Atty. Ryan Jay Ramos gi-ila ang pasalig ni Gobernador Pacquiao sa transparency ug accountability, ug sa padayon nga pagpaningkamot alang sa maayong pagdumala.
Dugang pa ni Atty. Ramos nga ang pagtinabangay tali sa mga nag-unang departamento sa Kapitolyo ug Sangguniang Panlalawigan usa ka testamento sa dili matarug nga pasalig sa PLGU sa pag-alagad sa mga Sarangan nga adunay “excellence and integrity.” (Rem Agdon)