Alabel, Sarangani Province – Takda nang sugdan ang pagpatukod sa Reaching towards an Uplifting and Empowering Life (RUEL) Pabahay Project ilawom sa Ronda Probinsya flagship program sa administrasyon ni Governor Rogelio “Ruel” D. Pacquiao human nga gipahigayon ang Groundbreaking Ceremony niini sa Purok Springville, Barangay Spring, Alabel.
Ang maong seremonya ang gipangunahan mismo ni Governor Pacquiao kauban ang mga opisyal sa probinsya ug sa Alabel sa pagpanguna ni Mayor Vic Paul Salarda.
Matod sa Gobernador nga malipayon siya nga makit-ang iyang nahimo ang iyang trabaho luyo sa mga imperpeksyon ug magpadayon kini sa paghatag sa iyang nakaya samtang anaa pa kini sa serbisyo.
“Nanghinaot ko nga malipayon mo, Kay malipayon pud akong kasing-kasing nga magtan-aw nga nahimo ko ang akong trabaho despite sa kakulangon Kay wala may perpekto nga usa ka lider, way perpekto nga tawo, ang important gihimo nato ang atong best, ang atong makaya habang kita nag serbisyo pa sa katawhan”, mensahe ni Governor Pacquiao.
Nasayran nga katibuk-ang 37 ka panimalay nga nagkantidad ug katibuk-ang P11.2 Million ang pagatukuron sa naasoy nga lugar kung asa ipahigayon ang pilot implementation sa maong proyekto.
Kahibaluan nga ang RUEL Pabahay ang namugna sa tumong nga mahatagan og disenteng kapuy-an ang mga katawhan nga nagpuyo sa mga delikado nga mga dapit sa Sarangani.
(Source: PGO-CDU/PIO)