Nagpadayon karong adlawa ang pagpatigayon sa Regional Vaccination Days sa tibuok Sarangani Province. Ang pagpahigayon sa Region 12 Vaccination Days ang gilangkuban sa unang bahin – Enero 24 hangtud Enero 26 – ug ang ikaduhang bahin Pebrero 7 paingon Pebrero 9.
Gituyo pagmugna ang pag-localize sa national vaccination days aron mabakunahan ang wala pa nabakunahan nga mga indibidwal sa Rehiyon Dose nga anaa pa sa 1.2 milyon ka tao, subay sa gipagawas nga DILG Regional Memorandum Circular No. 2022-01. Sa kasamtangan, anaa na sa 1.8 milyon ka mga indibidwal ang fully vaccinated sa Region 12, anaa kini sa kapin 52 percent.
Sa Sarangani Province, nikabat na sa 185,280 kabuok mga Sarangan ang malampusong nakabakuna sa ilang second dose batok COVID-19. Kini nga datus ang gipagawas sa opisina ni Sarangani Provincial Health Officer Dr. Arvin Alejandro as of January 20, 2022 pinaagi ni Ms. Razel Bustria, ang provincial vaccination coordinator. Adunay target population ang Sarangani nga 413,522, halos katunga pa ang kumpletong nabakunahan.
Maong makanunayon ang pagdasig ni Governor Steve Chiongbian Solon kauban ang pito (7) ka nagpakabanang mayor, bisan sila Vice Governor Elmer De Peralta, tanang board member, mga barangay kapitanes ug sila Senador Manny ug Congressman Ruel Pacquiao nga magpabakuna na, hilabi na nga subling nidaghan ang naigo sa Coronavirus epekto sa grabeng tapok-tapok atong Pasko ug Bag-ong Tuig.
Sa record sa Department of Health kagabii, as of January 24, nisutoy ang positibong kaso sa dakbayan sa Heneral Santos, 784 na ang active cases sa Gensan. Gisundan sa South Cotabato 561, ikatulo ang North Cotabato 406, Sultan Kudarat 228, ug ulahi ang Sarangani nga adunay 187 active cases.
Sa maong ihap, basi sa PHO Sarangani tracker, Glan ang sobra singkwenta (50>) ang aktibong kaso, nagsunod ang Alabel kwarentay otso (48), Maasim lagpas traynta (30>), Malungon sobra baynte (20>), Kiamba ug Maitum naa sa napulo (10) matag usa, wala kaabot lima (4) sa Malapatan.
Good news gihapon gumikan bisan gasaka ang mga natakbuyan sa makalilisang nga COVID-19 apan wala napuno ang mga hospital kana tungod sa ka-epektibo sa bakuna nga gasa gikan sa Ginoo. Wala ga-lala ang sitwasyon sa nanga-igo nga bakunado maong wala na sila dal-a pa sa mga balay-tambalanan gumikan nakasinati lang sila og mild symptoms, ang uban ang wala gani sintomas nasinatian.
Sama sa gibalik-balik paghisgot nila Governor Solon, pwede gihapon matakdan kung bakunado apan dili na mu-grabe ang kahimtang. Walay nausab sa direktiba ni Governor Solon nga dili mugawas kung wala man lay importanteng tuyo ug mag-face mask-face shield-mang-alcohol gyud sa tibuok lawas, maligo sa gawas una musulod sa balay, ug dos metros ang physical distancing sa publiko.
Mali ang ideya nga dili magpa-swab kay ideklara ra kunong COVID. Libre ang swab test sa Sarangani Province sa programa nila Governor Solon ug mga mayores maong walay angay kabalak-an sa bayad. Importante ma-swab gumikan halos magka-pareha ang sintomas sa ordinaryong flu.
Apan pinasahi ang COVID-19 tungod baga/lungs ang ginatumbok hangtud maglisod na sa pagginhawa ang pasyente. Sayo dapat mabal-an aron sayo matambalan.
(Source: PIO-Sarangani)