General Santos City – Kusganong gikondena sa General Santos City Police Office ang pagpatay kang PCPL Rasul Silo Alongan, kinsa gipusil sa wala mailhing mga suspek, Huwebes sa gabii, Abril 20.
Si Alongan, kinsa nadestino sa Police Station 5, gipusil sa usa ka kan-anan nga nahimutang sa Purok 11-A, Barangay Fatima.
“Among gihangyo ang publiko nga i-report dayon kanamo ang impormasyon bahin sa posibleng pag-ila sa mga suspek nga mahimong mosangpot sa hinanaling kasulbaran sa kaso ug among gipasalig nga among buhaton ang tanang paagi aron mailhan ug masikop ang mga sad-an,” sumala pa bahin sa mensahe sa GSCPO.
Sa inisyal nga imbestigasyon, nahitabo ang insidente mga alas 10:37 sa gabii.
“Ang duha ka suspek nagpakaaron-ingnong kustomer sa wala pa ang gunman niduol kang Corporal Alongan ug gipusil ang biktima makaduha ka higayon nga maoy hinungdan sa kamatayon sa biktima,” sumala sa taho sa insidente.
(Source: Mga Tingog sa Mindanao)