Gipanindot nga main entrance gate sa kapitolyo sa Sarangani pwede nang maagian, samtang LGU Sarangani na-download na ngadto sa mga munisipyo ang kinatibuk ang ₱ 260 milyones ka pesos pondo pang-imprastraktura para sa padayong kahapsay ug kalambuan sa mga ELCAC barangay sa Sarangani province.
Bag-o lang nahuman ang national ug local election apan daghan pang kalihukan pang-kalambuan ang natigayon sa LGU Sarangani sa pagpanguna ni Congressman-elect Governor Steve Chiongbian Solon kuyog sila Vice Governor Elmer De Peralta ug mga board member, sa pagsuporta nila Senador Manny ug Congressman Ruel Pacquiao.
High morale karon ang CSU o civil security unit naila sa tawag sa Kapitolyo sa Sarangani nga PSG kon Provincial Security Group sa pagdumala ni Retired Police Col. Jaime Tabucon gumikan natapos ug nagamit na nila ang bag-o nilang buhatan nga duha (2) ka andana. Gipakapinan pa og nindot ug habog nga watchtower.
Watchtower nga maoy katkatan panahon sa pag-monitor sa tibuok Sarangani Capitol Compound. 360 degrees view ang makita, masud-ong ang main building sa Kapitolyo, Capitol Grounds kung adunay MunaTo Festival, Sarangani Provincial Hospital, Sarangani Sports Complex, bisan na ang Sarangani Bay ug ubang parte sa lungsod sa Alabel.
Atubangan sa bag-ong PSG office ang bag-o usab nga guardhouse masiguro ang gasulod-gawas sa Kapitolyo. Unahan dyutay sa PSG office ug guardhouse ang gipanindot pud nga main entrance gate sa Sarangani Capitol Compound. Gi-disenyo kini nga daw susama sa gate sa mga first-class subdivision.
Kining tanan ang gipondohan sa pamunuan ni Governor Solon nikantidad og Syete Milyones ka pesos (₱ 7M). Bag-o kini na-blessingan kauban sila Board Member Tata Galzote, Board Member Joseph Calanao, Board Member Dr. Ruiz, Assistant Provincial Administrator Engr. Gerald Faciol, Provincial Engr. Jerry Belbider ug Assistant Provincial Engr. Elmer Jinco.
Sa pikas nga bahin, na-download na sa LGU Sarangani ngadto sa upat (4) ka munisipyo ang kinatibuk-ang ₱ 260-Milyones ka pesos nga pondo pang-imprastraktura sa mga ELCAC (el-kak) barangay.
Segun nila Focal Person Lizette Lopez ug DILG Provincial Director Sam Camaganacan, nag-monitor na lang sila karon sa gipaspason sa gimuntar nga mga imprastraktura sa mga kabarangayan gamit ang maong P260-Milyon ka pesos.
ELCAC barangay mao kini kadtong mga barangay nga gipuy-an kaniadto sa mga walhong grupo. Sa direktiba ni Pangulong Rodrigo Duterte, gipanagaan og tag-Baynte Milyones ka pesos (₱ 20M) ang matag benipisyaryong barangay aron itukod og mga infrastructure project nga makapahimulos ang mga residente kapugngan ang pagbalik sa rebeldeng kalihukan.
Tuod man, sa go signal sa DILG ug DBM, gitagaan og pagtugot sa Sangguniang Panlalawigan si Governor Solon sa pag-download sa maong mga pondo sa mga kalungsuran agi sa opisina sa mga mayor.
Infra project sama sa water system, health center, pagsemento sa mga kadalanan sa kabarangayan, ug daghan pa nga maoy kagustuhan sa mga lumulupyo. Upat (4) ka barangay ang pasiunang naka-benipisyo sa Alabel, upat (4) ka barangay usab sa Maasim, tulo (3) sa Malapatan, ug duha (2) sa Kiamba. Madugangan pa ang gidaghanon sa mga barangay nga matagaan og susamang pondo basi sa ebalwasyon sa taga-nasyonal nga gobyerno.
(Source: PIO-Sarangani)