General Santos City – Dili lang ang mga lugar nga kayang ma-abot sa patrol car sa kapulisan ang kinahanglang patrolan. kini ang gibutyag ni Police Brig. Gen. Jimili Macaraeg, Regional Director sa Police Regional Office 12. Tungod niini, gilusad ang project horse kon “Hinterland, Operational, Response for Service and Emergencies”.
Pamahayag niya nga daghan ang mga lugar sa probinsya sa Sarangani ang dili maabot sa mga sakyanan rason nga kinahanglan nga mugamit ug mga kabayo aron mapa-abot ang mga programa sa kapulisan ug magamit usab panahon sa mga emerhensya. Saysay niini nga dakong tabang ang “PROJECT PADYAK” ni Police Col. Nicomedis Olaivar Jr., Provincial Director sa Sarangani Police Provincial Office apan limitado lang usab ang maabot niini.
Dugang pamahayag ni Police Brig. Gen. Macaraeg nga dili lang ang probinsya sa Sarangani ang hatagan nila ug kabayo kundili ang tanang probinsya sa rehiyon nga nagkinahanglan. Gani lakip sa hatagan mao ang probinsya sa South Cotabato, Sultan Kudarat ug North Cotabato.
Nauna lang matud pa ang lima ka mga kabayo ngadto sa Sarangani Province.Samtang sa ubang lugar nga dili kinahanglan hatagan ug kabayo, nauna na sila nga nag-propose nga hatagan ug mga bangka hilabina para sa mga Police Station nga adunay nasakupan nga kadagatan.
Samtang gibutyag ni RD Macaraeg nga nakatakdang mubisita ang mga personahe sa kapulisan gikan sa kampo crame ngadto na sa Police Regional Headquarters. alang kaniya, usa kini sa mga higayon nga iyahang magamit aron nga malatag ang tanang programa sa kapulisan sa rehiyon ug mapangayuan ug igong pondo.
Gawas sa dugang kabayo ug mga bangko, lakip sa mga plano niini mao ang pag-request ug kaugalingong chopper sa Police Regional Office 12 ug siya positibo nga sa pag-abot sa mga opisyal gikan sa kampo krame aduna kini positibong tubag. (Fred Degala)