General Santos City – Human sa pipila ka buwan nga screening process nga gihimo sa Police Regional Office 12-Recruitment and Selection Board sa Liboan ka mga aplikante, 200 na lang ka mga bag-ong pulis nga mamahimong Patrolman/Patrolwoman ang pormal nga nanumpa isip dugang mga sakop sa PNP-PRO 12 kagahapong adlawa, Lunes, Disyembre 23, 2024 nga gipahigayon sa Grandstand sa PRO 12, Tambler, General Santos City.
Si Police Brigadier General Arnold P Ardiente, Officer-In-Charge sa PRO12 ug Police Brigadier General Constancio T Chinayog Jr., Acting Director for Personnel and Records Management, maoy nangulo sa maong oath-taking nga gisaksihan sa mga pamilya sa mga bag-ong pulis.
Ang pinasidunggang dinapit nga si PBGen Chinayog, mainitong miabi-abi sa mga recruit ug sa iyang mensahe iyang gipasiugda nga ang pag-aplay sa serbisyo sa pagkapulis nag-uban sa kalisod ug dakong responsibilidad busa kinahanglang hatagan nila og bili ang ilang serbisyo ug mahimong responsable nga uniporme nga pulis nga adunay pag-atiman ug gugma sa katawhan.
Ang nasangpit nga gidaghanon sa mga bag-ong pulis gi-turnover dayon ngadto sa Regional Training Center 12 alang sa pagsugod sa ilang Public Safety Basic Recruitment Course (PSBRC) aron ipaubos sa 6 ka buwan nga pagbansay-bansay nga magsilbi nga pundasyon nga maghatag og igong kahibalo sa pagpahigayon. mas maayo ang ilang mga katungdanan.
Ang mga bag-ong pulis nga adunay ranggo nga Patrolman/Patrolwoman makadawat og sweldo nga Php29,668 matag buwan lakip na ang ilang allowance samtang anaa sa training. (Rem Agdon)
News&Photos: PCADG12