Alabel, Sarangani – Isip kabahin sa kasaulugan sa National Cooperative Month, ang probinsya sa Sarangani ang nagpahigayon sa pinaka-unang 1st Ronda Probinsya Kusog Kooperatiba Summit 2022 miaging Oktubre 28 sa may Capitol Gym, nga gitambungan sa mga nagkadaiyang mga kooperatiba sa pito ka mga munisipyo sa Sarangani.
Kung kahibaloan nga pinaagi sa Republic Act 11502 series of 2020, gideklara nga ang bulan sa Oktubre isip National Cooperative Month nga nagmando sa tanang mga kooperatiba sa tibook nasud nga i-selebrar pinaagi sa mga aktibidad.
Sa pamahayag ni Therese Faith Gavan, ang provincial cooperatives development officer-designate, nga ang gihimong summit sa probinsya mao ang pagdasig sa mga kooperatiba nga mamahimong aktibong partner sa probinsya, ug ang maila usab ang ilahang kontribusyon sa pagpaayo sa nasud.
Sa maong katiguman, kauban ang mga provincial ug mga opisyal sa munisipyo, bisita gikan sa Cooperative Development Authority (CDA) ang mitambong sa aktibidad.
Sa pagka-karon ang probinsya sa Sarangani ang aduna na’y 66 ka mga kooperatiba (as of June 30, 2022) nga gi-isyu nga COC ug 10 pa niini ang gina-proseso pa ang ilang mga papeles.
Mga nagkadaiyang mga kooperatiba ang naglangkob sa Sarangani sama sa multi-purpose cooperative, transport, credit, agriculture, marketing, produces, consumers, agrarian reform, service, small-scale mining, fishing, ug dairy cooperatives.
(Source: PIO-Sarangani, photo courtesy by Martin Fernando Bernad Jr.)