Padayong nagmaya karon ang mga taga-Malapatan, Sarangani Province partikularminte ang upland barangay nga Daan Suyan gumikan bag-uhay lang gi-groundbreaking ang mga dagko nila nga proyekto bisan pa man sa nagsingabot nga May 9 election.
Gisugdan na atong bulan sa Pebrero ang pagpasemento sa ilang dalan nga nag-konekta sa Barangay Upper Suyan ug Barangay Kinam. May pondo nga Traynta Milyones ka pesos (₱ 30M) gikan sa Sulong Imprastraktura program ni Governor Chiongbian Solon, katambayayong sila Vice Governor Elmer De Peralta ug mga board member.
Segun nila Assistant Provincial Administrator Engr. Gerald Faciol ug Assistant Provincial Engr. Elmer Jinco, kumpleto na kini sa box culvert, konkretong lined canal ug mga warning signal susamang makita sa mga national highway. Sugdan na usab ang pagpatindog sa ilang bag-ong barangay hall nibalor og Singko Milyones ka pesos (₱ 5M) gikan sa LGU Malapatan sa pagdumala nila Mayor Jun Sumbo, Vice Mayor Jean Delos Santos ug mga konsehal. Sugdan napud ang pagpabarog sa ilang barangay gymnasium pangunahan sa DPWH Sarangani nikantidad og laing Singko Milyones ka pesos (₱ 5M) gikan sa opisina ni Congressman Ruel Pacquiao kaabag si Senador Manny Pacquiao. Daghan pang mudangat nga mga kaayuhan sa mga kabarangayan, magkugi lang ang mga barangay official sa pagpabalo sa ilang munisipyo ug Kapitolyo.
Mapasalamaton sila Mayor Sumbo, Vice Mayor Delos Santos, bisan na sila Municipal Councilor Elvira Opong ug Chief of Staff Atty. Ryan Ramos sa tanang opisyales ug katawhan nga nagtinabangay aron maangkon ang dugay nang gipangandoy nga mga kalambuan, apil na ngadto sa Pamilyang Segafu nila Kapitan Elizalde Segafu ug uban pang pamilya nga nag-donar sa mga luna kabutangan sa maong mga imprastraktura.
Sa pikas nga bahin, gikumpirma ni Engr. Alain Alcala, ang provincial planning and development coordinator sa probinsya sa Sarangani, nga nagpaabot na lang sila karon kanus-a sugdan ang ikaduhang bahin o phase 2 sa pagpasemento sa farm-to-market road nga nagkonekta sa Barangay Calabanit ug Barangay E. Alegado sa lungsod sa Glan hapit ₱ 250 Milyon ka pesos. Gipondohan sa PRDP-World Bank. Unang nasemento kini tuig 2019 nidagan og ₱ 40 Milyon ka pesos sulod sa sobra upat (4) ka kilometros.
Gihan-ay na lang karon sa PPDO Sarangani ang ubang rekositos ug ang sertipikasyon gikan sa NCIP aron masugdan na ang padayong pagpasemento. Samtang gikumpirma gihapon sa labaw sa PPDO Sarangani nga aprobado na sa level sa regional board sa PRDP ang pag-pondo og sobra ₱ 178 Milyon ka pesos para masumpayan ang farm-to-market road gikan Barangay Alegria padulong sa Pait, Alabel.
Aminado si Engr. Alcala nga kung saligan ang salapi sa Kapitolyo, maglisod gyud kini nga masemento tungod sa limitadong pondo. Apan adunay PRDP-World Bank matud pa nga ga-alalay og sakto sa liderato ni Governor Solon.
(Source: PIO-Sarangani, photo courtesy of Malapatan Information Office Facebook page)
