General Santos City – Nababagan sa Bureau of Jail Management and Penology (BJMP) sa GenSan City Jail ang sulay nga pagpalusot og shabu.
Ang gituohang shabu ang gibutang sa usa ka ginang sa rejuvenating set ug gisuksok sa bra.
Matud ni Jail Senior Insp. Neremias De Quia, deputy jail warden si alyas Emily, 50-anyos, taga Barangay Bula ang modala unta sa usa nila ka piniriso.
Apan dihang pagrekisa kaniya ug sa iyang bitbit, didto na nadiskubre sa mga personahe sa BJMP ang pakete sa iligal nga droga.
Mokabat sumala pa sa P1,360 ang kantidad sa gidudahang shabu ang naimbargo sa ginang nga una nang nanghimakak nga iyaha ang maong iligal nga kontrabando.
Dugang ni De Quia, ang kontrabando ang nababagan tungod sa hugot nga seguridad ug intelligence nga gipatuman sa jail facility.
Samtang, kasong dunay kalabutan sa iligal nga droga ang gipasaka sa sakop sa Makar Police Station batok sa dinakpan. (Geovanni Pasco)