General Santos City – Nagpadayon pa ang gihimong imbistigasyon sa Police Station 1 kalabutan sa laing pagpamusil patay nga natigayon dinhi sa syudad pasado alas 11:00 ang takna sa buntag kagahapong adlawa sa area Sampaguita Street corner Zapote Street, barangay East, Gensan.
Giila ni Police Lt. Omar Barret, Deputy Chief of Police sa Pendatun PNP ang biktima nga si Victor Viagedor,42 anyos, tricycle driver, residente sa New Society, Barangay Apopong ning syudad.
Base sa ilang inisyal nga imbistigasyon, nagmaneho sa iyang tricycle ang biktima pag-abot sa lugar kalit kining gitaparan sa usa ka lalaking nakamotorsiklo dayon gipusil.
Paspas nga misibat ang suspek gikan sa lugar human sa insidente, samtang ang biktima gitabangan sa mga tawo nga anaa sa lugar aron madala sa ospital. Ala 1:00 pasado sa hapon kagahapong adlawa dihang nakabsan gyud sa iyang kinabuhi ang biktima samtang kini gipailawom sa medikasyon.
Narecover gikan sa crime scene ang usa ka slug ug usa ka fired bullet sa 9mm nga pistol.
Dugang pa ni Barret nga posibleng gisundan o giatngan sa suspek ang biktima didto sa lugar. Posible matud pang nihunong ang biktima sa intersection mao nga nakahigayon ang suspek sa pagpusil kaniya.
Sa karon ginasuta na sa Police Station 1 ang mga naka-install nga CCTV sa palibot kansa makatabang gyud ug dako sa ilang imbistigasyon.
Usa sa mga anggulong gitutukan sa kapulisan kalabutan sa maong insidente mao ang personal grudge. (John Rey Somido)