Gipaniguro sa hepe sa Koronadal Police Station nga si PLt. Col Joedylito Guisingga nga dili na ma-usab ang nahitabong pagdungan ug pag-atbangay sa duha ka grupo nga anti ug pro open pit mining atubangan mismo sa Provincial Capitol sa South Cotabato.
Kahinumdumang pulos adunay mga lehitimong permit ang duha kampo sa pagpahigayon og panagtapok, apan nahitabong adunay lapses sa bahin sa pro- open pit mining mahitungod sa plaza ang orihinal nga venue ug dili sa kapitolyo nga maoy venue sa anti-open pit mining. Ang anti-open pit mining ang gipangunahan sa mga lideres ug sakop sa simbahang katoliko ug ubang sektor nga supak sa pag lift sa ban sa open pit mining.
Nagpahigayon sila og prayer caravan nga tumong nga matagaan og pagtagad ni Governor Reynaldo Tamayo Jr, ang ilang mulo nga i-veto ang nahimong desisyon sa SP nga i-lift ang ban sa open pit mining sa Tampakan samtang ang pro-open pit mining ang gipangunahan sa mga IP leaders ug mga pabor sa pagmina.
Gibutyag ni LtCol. Guisingga nga last hour na sila nahatagan og impormasyon nga adunay panagtapok ang mahitabo sa naasoyng lugar apan ang importante matud pa nga walay kakulian ang nahitabo ug namintina ang kahapsay sa naasoyng aktibidad. (John Rey Somido)
