General Santos City – Patay ang usa ka Pastil Vendor human kining gipusil sa wala pa mailhing suspek alas 5:35 ang takna kaganinang kabuntagon, sa area sa purok Crossing Makar, Barangay Labangal, GenSan.
Ang biktima nailang si Esmael Guiamel, 46 anyos, pastil vendor, residente sa purok Malipayon, Barangay Labangal, Gensan.
Subay sa pakighinabi ngadto sa asawa sa biktima nga si Mary Jane Guiamel, bag-uhay lang gyud silang miabot sa lugar particular sa ilang pwesto diin ablihan na unta sa biktima ang ilang tindahan dihang kalit lang miduol ang usa ka lalaki dayon gipusil ang iyang bana pila ka higayon.
Naka-angkon ug tulo ka mga samad sa iyang lawas ang biktima particular sa iyang nawong, ug sa dughan nga hinungdan sa iyang kamatayon.
Paspas nga midagan ang suspek padulong sa kaubanan niining naghuwat dayon sibat gikan sa lugar.
Sumala ni Mary Jane nga wala siyay nasayran nga nakalaban ang iyang bana apan giangkon niini nga may nakalalis ang nasangpit didto mismo sa lugar gumikan sa bayad matud pa sa lamesa. Wala hinuon ginganlan sa ginang kung kinsa ang nakalalis sa iyang bana. Sa karon, nagpadayon pa ang gihimong imbistigasyon sa kapulisan kalabutan sa maong insidente. (Alfredo Madas Jr.)