Sarangani Province – Pinaagi sa Memorandum No. 241- 2023 gimando ni Sarangani Governor Rogelio Pacquiao ang pag-inspeksiyon sa mga building ug mga opisina sa Provincial Capitol kagahapong adlawa (Nobyembre 20, 2023) human mihapak ang 6.8 magnitude nga linog niadtong Biernes sa hapon.
Gimando-an ni Gov Pacquiao, ang Provincial Engineering Office, Provincial Disaster Risk Reduction and Management Office, Provincial General Services Office, Bureau of Fire Protection-Sarangani, ug Office of the Building Official nga magpahigayon ug dinaliang, paspas, ug hingpit nga structural inspection.
Kini aron masuta ang gidak-on sa kadaot, kon aduna man, sa James L. Chiongbian (JLC) nga nag-unang edipisyo ug uban pang mga imprastraktura sulod sa Provincial Capitol Compound.
Sa wala pa ang inspeksyon, si Gobernador Pacquiao nipagawas na og Executive Order No. 71, s. 2023 nga nagdeklara sa work-from-home arrangement sa mga opisina sa gobyerno, ingon man ang pagsuspenso sa face-to-face nga klase sa mga eskwelahan aron mahatagan og dalan ang post-earthquake inspection sa mga imprastraktura para sa public measure.
Human sa sunodsunod nga inspeksyon, si Provincial Administrator Atty. Ryan Jay Ramos niingon nga ang inspection team namahayag nga ang unang andana hangtod sa ikaupat nga andana sa JLC Building luwas nga okuparon ug gamiton. (Rey Ombana, photo courtesy of PIO- Sarangani)