Dos turtuga nombrao como el “Green Sea Turtles” el ya larga na mar mga personajes del Community Environment and Natural Resources Office del Piñan, Zamboanga del Norte, asegun con el Departamento de Medio Ambientes y Recursos Naturales or DENR del Martes.
Asegun con el oficina regional del DENR, con el dos turtuga ya larga del otro semana na mar del Barangay Banbanan, ciudad de Dapitan, Zamboanga del Norte.
El carapacho (carapace) del uno del dos turtuga tiene el largor de 68.15 centimetros con el anchor de 65 centimetros.
El Segundo turtuga, tiene el largor del carapacho de 71 centimetros con anchor de 65 centimetros.
Con el dos turtuga ya entrega na oficina del agricultura del ciudad de Dapitan el un Pescador, quien ya encontra canila adentro trampa de pescao na canto’y aplaya del Barangay Polo del mencionao ciudad del Octubre 15.
Con el dos turtuga ya pone anay bajo del rehabilitacion antes que ya pone etiqueta y ya larga canila del otro semana na mar del Barangay Banbanan, ciudad de Dapitan.
El DENR ta apela con el publico para informa canila si tiene quien ay puede encontra turtuga na de ila comunidad.
(B. Garcia, photo courtesy of CENRO-Piñan)
