Malipayong gibutyag ni Mr. Toto Terando, ang program manager sa Sulong Tribu program ni Governor Steve Chiongbian Solon, nga nahuman na nila panghatag ang honorarium ngadto sa mga barangay tribal chieftain sa probinsya sa Sarangani para sa nakalabay nga tuig 2021.
Kini isip dyutay nga pahalipay sa dakong papel sa mga chieftain nga malinawon ang mga kabarangayan. Wala nay halos maabot nga mga reklamo sa mga barangay hall tungod sa level pa lang sa barangay chieftain sa IP community na-settle na ang mga problema. Ang mga chieftain ang dili sweldado sa gobyerno itandi sa mga IPMR.
Adunay ginadawatan nga monthly honorarium ang mga chieftain gikan sa ilang mga munisipyo agi sa mga mayores, augmentation kining sa probinsya. Karong tuiga 2022, mahimo na nga P1,500 ka pesos ang binulang honorarium gikan sa Kapitolyo sa Sarangani alang sa 136 kabuok tribal chieftains.
Wala pay labot dinhi ang permanenteng pondo sa opisina ni Governor Solon anaa sa Two Hundred Thousand Pesos (P200,000) sa matag municipal tribal council alang sa pagpahigayon nila og mga tribal meeting ug daghan pang aktibidad sa tribu.
Samtang ang mga opisyales sa Sarangani Provincial Tribal Council ang dugay na nga nagadawatan og binulang allowance gikan sa Provincial Government sa Sarangani, P4,000 paingon P7,000 ka pesos ubos sa administrasyon ni Governor Solon. Aduna pay dungag assistance para sa ilang mga kalihukan.
Segun ni Program Manager Terando, giila pag-ayo sa pamunuan ni Governor Solon ang nagkadaiyang tribu sa Sarangani Province aron padayong magtambayayong sa kahapsay ug kalambuan, sa pagsuporta nila Vice Governor Elmer De Peralta ug mga board member hilabi na ni IPMR Board Member Ben Donato.
Gani, ang bag-ong labaw karon sa Provincial Assessor’s Office nga si Provincial Assessor Honnelyne Guilley-Toyogon, ang gikan sa tribung Tagakaulo sa Malungon. Ug ang napuli ni the late Board Member Tatang Paras sa Liga sa mga Barangay human nitaliwan sa balatian mao si Board Member Umbra Pangolima gikan sa mga kaigsoonang Muslim sa Malapatan.
P4,000 ka pesos ang monthly honorarium gikan sa Sulong Kapayapaan program ni Governor Solon ngadto sa mga Ustadz nga maoy kugihan gatudlo sa mga kabataang Moro sulod sa mga Madrasah Arabic school entiro Sarangani Province.
Sa pikas nga bahin, nikabat sa halos Duha Ka Libo (2K) ka tao sa Sarangani ang nakadawat og cash assistance gikan sa DOLE-TUPAD program niaging tuig 2021. Kini ang gibutyag ni Ms. Glenda Revaño, nangulo sa Public Employment Service Office kon PESO Sarangani, sa pakig-alayon sa DOLE Region 12 ug DOLE Sarangani.
Sa ayuda matud pa nila Congresswoman Loren Legarda, DOLE ug Senador Joel Villanueva nga nag-konekta sa buhatan ni Governor Solon, gawas sa hinabang nila Senador Manny ug Congressman Ruel Pacquiao, napadayon ang DOLE-TUPAD sa entiro Sarangani pag-alalay sa informal sector nga hilabihang na-apektuhan ang panginabuhian sa pandemya, ang uban kanila ang nakadawat karon lang pagsugod sa tuig.
Naka-angkon og P3,360 hangtud P5,000 ka pesos ang matag kwalipikadong indibidwal gikan sa grupo sa mga driver, barangay defense volunteers, peace advocates, mananagat, mag-uuma, out-of-school youth, mga galibod og paninda, gapa-manicure, gapang-gupit og buhok ug ubay-ubay pa sa informal sector.
(Source: PIO-Sarangani)
