General Santos City – Giingong gitugyan na sa City Housing Land Management Office (HLMO) ngadto sa buhatan ni Barangay Calumpang chairman Arthur Ryan Dupalco ang “tawag” kon tugotan ba nga makabalik ang mga residente sulod sa gititulo nga propyedad sa Purok Saeg area, ang mga residente nga na-biktima sa sunog.
Sa pakighinabi sa RPN GENSAN, gipahimug-atan ni City Housing Czar Mary Ann Tan nga sa habig sa gobernador sa dakbayan tataw ang baruganan sa gobyerno nga dili na tugotan ang mga bakwit nga pamilya nga makabalik sa maong pribadong kabtangan.
“Gi-pronounce ba gyud niya nga dili siya mupugong? Sad to say, pero klaro kaayo ang local government nga kay private property man ni, dili ta motugot sa akong level. Pero kung naa siyay tawag iyaha na,” ug Tan.
Dugang pa sa opisyal nga ang bisan kinsang opisyal sa publiko nga mosugot sa mga informal settlers mahimong mag-atubang sa kaso sa Office of the Ombudsman.
“Dili ta mobuhat ana kay Ombudsmandable kana. In case naay mahitabo, pwede na mi pasakaan og kaso sa Ombudsman kay private property man na.”
Giangkon usab ni Tan nga hangtod karon wala pay lugar nga kabalhinan sa mga apektadong residente tungod kay gi-okupar na sa mga bag-ong settler ang relocation site nga gitukod sa Guardian Hills, Barangay Bawing.
“To be honest occupied na among units sa Guardian Hills. Morag nagplano pa mi kung asa mopalit. To be honest, walay relocation site ang siyudad.”
Sa sayo pa, sa pakighinabi sa RPN GENSAN, giangkon ni Chairman Dupalco nga dili kini makapugong sa mga residente nga gustong mobalik sa ilang kanhing pinuy-anan tungod sa ilang panginabuhian.
“Kasagaran kung nahitabo ang sunog, sa Purok San Juan, sa miaging tuig sa 2018, nasunog na usab, sa San Miguel, na usab. Sa Puting Bato, uli. Sa Saeg, dugay na ang maong mga informal settlers.” Dili ta makapugong kay ang tag-iya sa yuta wala’y labot,” matod ni Dupalco.
(Source: GSC HMLO | Barangay Calumpang Office)