General Santos City – Ang sunod-sunod nga malampusong mga operasyon sa pagpatuman sa balaod nga gihimo sa mga personahe sa Police Station 2, City Intelligence Unit, City Mobile Force Company – Special Weapons and Tactics, ug Regional Intelligence Division 12 miresulta sa pagkasikop sa usa ka suspek ug pagkasakmit sa ilegal nga drugas, armas, ug mga paraphernalia.
Ang unang operasyon nahitabo mga alas 10:55 sa buntag niadtong Marso 16, 2025, sa Purok Buan, Barangay Sinawal, General Santos City. Kini gipatuman ubos sa Search Warrant nga giisyu sa Regional Trial Court, Branch 23, General Santos City, pinetsahan ug Marso 13, 2025.
Nasikop sa operasyon ang usa ka 35-anyos nga alyas “Michael J.”, negusyante ug residente sa nahisgutang barangay.
Atol sa pagrekisa, nasakmit sa mga otoridad ang duha ka rectangular transparent heat-sealed plastic sachet nga adunay sulod nga gidudahang shabu, nga gibana-banang motimbang og 12 gramos, ug usa ka rectangular transparent heat-sealed sachet nga adunay sulod nga gidudahang pinauga nga marijuana, nga motimbang og 0.4 gramos. Mokabat sa Php 81,648.00 ang kinatibuk-ang gibana-bana nga street value sa mga nasakmit nga illegal substance.
Dugang niini, nakuha usab ang usa ka kalibre .45 nga pistola, duha ka magazine, 26 ka buhing bala, ug nagkadaiyang drug paraphernalia.
Nianang adlawa, alas 2:55 sa hapon, gipahigayon ang follow-up operation sa Agan North, Barangay San Isidro, General Santos City, ubos sa Search Warrant.
Ang pagrekisa gihimo diha sa presensiya sa susamang suspek hinungdan nga narekober ang usa ka basiyo sa bala sa kalibre .45 nga armas ug mga drug paraphernalia.
Gidala sa Police Station 2 ang dinakpan lakip na ang mga nakumpiska nga mga butang alang sa tukmang dokumentasyon ug disposisyon. Kasong kalapasan sa Republic Act 10591 (Comprehensive Firearms and Ammunition Regulation Act) ug Republic Act 9165 (Comprehensive Dangerous Drugs Act of 2002) ang giandam na. (Rem Agdon)
News&Graphic: RPIO-PRO12