General Santos City – Paslak karon sa bilanggo-an sa Pendatun Police Station ug takda silang mag-atubang og kasong kalapasan sa R.A. 9165-Comprehensive Dangerous Drugs Act of 2002 ang usa ka maglive-in partner human sila nasapon nga namaligya’g bawal nga druga atol sa hini-usang drug buy-bust operation sa managlahing yunit sa kapulisan sa Purok San Roque, Brgy. Dadiangas West, General Santos City, Oktubre 4, 2024.
Gi-ila sa mga awtoridad ang mga dinakpan nga sila alyas Rocky, 35 anyos, gikonsiderang High Value Target (HIV), residente sa lugar diin sila nadakpan ug alyas Ekang, 20 anyos, gikonsiderang Street Level Individual (SLI), residente sa Block 6, MC Village, Brgy. Fatima, General Santos City. Subay sa Press Release sa Police Regional Office (PRO) 12, galusad og hini-usang drug buy-bust operation ang City Police Drug Enforcement Unit, City Intelligence Unit, Police Station 1 nga pulosilalum sa General Santos City Police Office, RPDEU 12, RID 12 Tracker Team Bravo, RSOG 12, ubos sa koordinasyon sa PDEA 12 target ang nasampit nga mga dinakpan.
Sa maong higayon, ang pulis nga nagpaka-aron-ingnong drug buyer nakapalit gikan kang alyas Rocky og usa ka gamay nga plastic sachet nga adunay sulod nga gidudahang shabu nga motimbang og 0.15 gramos nga adunay gibanabanang National Standard Drug Prize nga P1,020.00 ug maoy hinungdan sa pagkasikop sa naasoy nga maglive-in partner.
Narekober gikan sa posisyon ug kontrol sa maong lalaki ang P1,000 pesos nga buy-bust money, 3 ka small size ug 35 ka mga dagkong plastic sachet nga adunay sulod nga gibanabanang kinatibuk-ang gibug-aton nga 175.45 gramos sa gituohang shabu, nga adunay gibanabanang National Standard Drug Prize nga mokabat sa P1,193,060.
Samtang nakuha sab gikan sa posisyon ug kontrol ni Ericka ang 2 ka gagmay nga plastic sachet nga adunay gibanabanang gibug-aton nga 0.3 gramos sa gituohang shabu, nga aduna sab gibanabanang National Standard Drug Prize nga P2,040.00.
Ang pagmarka ug pag-imbentaryo sa mga nakuhang ebidensiya gisaksihan nila Rustom Lariosa- Media representative sa Radyo Probinsyano, ug Konsehal Romeo Benatero sa Barangay Dadiangas West, General Santos City. Tungod niini, gidayeg gayud ni PNP-12 Regional Director PBGen. Jamili Macaraeg ang mga operatiba nga naghimo maong operasyon nga malampuson. REY G.OMBAÑA
Photos: PRO12