Nagpahimangno karon ang LGU Sarangani nga magbinantayon bisan ning panahon sa Semana Santa tungod nagpadayon ang La Niña phenomenon. Unang gikataho nga hangtud na lang karon sa bulan sa Abril ang La Niña apan sa bag-ong report, posible pang masinatian ang mga pag-ulan hangtud bulan sa Hunyo paingon sa Agosto.
Gani, ang Bagyong Agaton ang padayon pang nangdaot sa Visayas. Baynte (20+) na kapin ang nangamatay sa landslide sa may Leyte. Sa Sarangani Province, grabeng kakusog sa hangin ang natagamtaman sabay sa pag-landfall sa Bagyong Agaton atong adlaw nga Domingo sa may Samar tungod anaa usab ITCZ kon intertropical convergence zone sa Mindanao. Sa taho sa opisina ni PDRRMO Action Officer Rene Punzalan kuyog si Operations Officer Robert Lubonting, pipila ang mga natumbahan sa mga punuan sa kahoy ug nanglupad ang mga atop, maayo na lang walay nakalas nga kinabuhi sa Sarangani.
Apan wala pa man kagawas sa Philippine Area of Responsibility si Agaton, laing bagyo napud ang naa sa Pilipinas karon ginganlan og “Basyang.” Una nang nagpadala og linibo ka litros sa krudo ang pamunuan ni Governor Steve Chiongbian Solon para magamit sa mga heavy equipment sa LGU Alabel dungan sa mga pagbaha niaging semana gumikan sa naunang LPA o low pressure area.
Sa pikas nga bahin, apil gipabantayan sa LGU Sarangani ang hulga sa laing makalilisang nga virus makapatay sa mga binuhing manok, pato, ganza, bebe, pugo ug pabo, ug makatakod ug makapatay usab sa tao kung ma-grabehan, ug kana mao ang Bird Flu. Todo-bantay karon ang mga checkpoint dili lang sa sakit sa baboy nga virus gihapon ang hinungdan gitawag nga ASF o African Swine Fever nga kasagaran sa gibahog nga lamaw makuha, ug ang padayon nga pagpatuman sa personal health protocols kay padayon pang nanakod ang Coronavirus, kundili apil na ang lain napud nga virus, ang avian influenza naila sa tawag nga Bird Flu. Daghan ng mga poultry ang nangalaras karon sa Tacurong City sa katapad ra nato nga lalawigan sa Sultan Kudarat, apil na ang Davao del Sur.
Maong paspas nakapahigayon og pag-blood sampling ang buhatan ni Provincial Veterinarian Dr. Bernard Cababat. Negatibo ang nakuha nilang sample sa Kiamba ug Maitum, hilabi na sa mga bebe anaa sa kabasakan nga maoy kasagaran da-li mataptan og gadala sa Bird Flu.
Hinanaling nakapagawas og executive order si Governor Solon sa pakig-alayon sa mga municipal mayor, municipal agriculture office, barangay councils ug Department of Agriculture, sa pagsuporta nila Vice Governor Elmer De Peralta, mga board member, bisan na nila Senador Manny ug Congressman Ruel Pacquiao, aron sa checkpoint pa lang maharang na ang walay sertipikasyon.
Dako nga industriya ang poultry ug pradaksyon sa itlog sa probinsya sa Sarangani. Adunay mga commercial poultry operator, sama na lang sa Alabel nga dise otso (18) kabuok broiler farm, dise nuybe (19) ka broiler farm sa Malungon, tulo (3) sa Maasim, duha (2) ka layer farm sa Kiamba, ug daghan pang backyard raising sa ubang kalungsuran.
(Source: PIO Sarangani)