General Santos: LGU Sarangani benipisyaryo sa P67.5-milyones ka pesos nga pondo gikan sa DOH karong tuiga alang sa nagpadayon nga infra projects sa mga hospital, samtang 221 na ka surgical cases ang malampusong na-operahan sa Sarangani Provincial Hospital

0
125

Gikumpirma ni Provincial Health Officer Dr. Arvin Alejandro nga padayong nakadawat og grant ang LGU Sarangani gikan sa Department of Health karong tuiga 2022.

Visit RPN DXDX General Santos

Dakong bulto sa pondo gawas sa Human Resource for Health (HRH) Deployment ang gitagana sa Health Facilities Enhancement Program, hilabi na sa padayong imprastraktura alang sa mga pampublikong hospital sa Sarangani Province.

Gani, P25-Milyon pesos ang nakuha para sa padayong kalambuan sa bag-ong East Wing building sa Sarangani Provincial Hospital unang maka-benipisyo ang kasikbit nga mga lungsod sa Alabel ug Malapatan.

P11.5-Milyon ka pesos para pud sa mutindog nga super health center sa Glan, ug laing P11.5-Milyon ka pesos alang sa super health center sa Kiamba. Gitawag kini nga super barangay health center tungod daghang pasilidad ang madungag, sama sa xray machine nga anaa na mismo mahimutang sa maong upgraded barangay health center.

Samtang, adunay P12-Milyon ka pesos ang nahagdaw para sa infra expansion sa Maitum Municipal Hospital, P5-Milyon ka pesos alang sa Maitum Municipal Health Office, P1.5-Milyon ka pesos para sa Kiamba Municipal Health Office, ug P1-Milyon ka pesos sa Malapatan Municipal Health Office.

Gipakapinan pa og P2.5-Milyon ka pesos para ipalit og bag-ong ambulansya gamiton sa Malungon Municipal Hospital, ug ang P8-Milyon ka pesos dungag medical equipment sa Kiamba Municipal Hospital.

Ang maong P67.5-Milyon ka pesos gikan sa DOH para sa infra component, P2.5-Milyon ka pesos sa bag-ong ambulance, ug P8-Milyon ka pesos dungag medical equipment ang kabahin lamang sa P256.8 Milyones ka pesos nga grant sa Department of Health para sa probinsya sa Sarangani karong tuiga.

Ongoing ang public bidding sa mga nahisgutang hospital infra projects ug mga kagamitan pang-hospital. Gikalipay kini pag-ayo ni Governor Steve Chiongbian Solon gumikan nagpusot-pusot sa gihapon ang mga milyones nga pondo gikan sa gobyernong nasyonal bisan pa man nga patapos na ang termino niini sa pagka-gobernador.

Dako kayo kining pag-ayuda sa iyang Sulong Kalusugan program nga may alokasyon karong tuiga nikabat sa P688-Milyones ka pesos gikan sa panudlanan sa Kapitolyo, katambayayong sila Senador Manny ug Congressman Ruel Pacquiao, Vice Governor Elmer De Peralta, mga board member ug mga mayores.

Usa sa napondohan ang padayong pagpalambo sa imprastraktura sa Maasim Municipal Hospital adunay budget nga P2.4-Milyon ka pesos.

Sa pikas nga bahin, gikumpirma ni Doctora Aileen Brion, ang chief of hospital sa Sarangani Provincial Hospital, nga nikabat na sa two hundred twenty-one (221) kabuok surgical cases ang ilang malampusong na-operahan sulod sa provincial hospital sa Sarangani gikan atong bulan sa Nobyembre pagkahimo nga Level 1 hospital hangtud atong adlaw nga Martes, Abril 19.

Ang mando matud pa ni Governor Solon kanila mao ang sakto ug pantay nga pag-atiman sa mga pasyente. Kung unsa ang serbisyo nga makuha sa mga may kaya ang makuha ug madawat usab kini dapat matud pa sa mga uyamot nga pasyente.

(Source: PIO-Sarangani)

Leave a Reply