Tbolo, South Cotabato – Katu-ohan o dili, pero mao kana ang aktuwal nga nahitabo sa usa ka lalaking empleyado sa Local Government Unit (LGU) sa Tbolo, South Cotabato human kini naligsan pag-unay sa gimanehong Road Roller Heavy Equipment nga mas ilado sa tawag nga pison. Nahitabo ang insident alas-12:00 sa udtong tutok sa Sitio Lamtambal, Brgy. Talcon, T’boli, South Cotabato ning nakalabay’ng Oktubre 4, 2023.
Si T’boli Chief of Police Lt. Col. Verlin Pampolina nag-ila sa biktima nga si Jun Ewong Lumbong, 50-anyos ug nagpuyo sa Brgy. New Dumangas, T’boli.
Asoy ni Col. Pamplina, mi-ambak sa gimaneho nga pisson si Lumbong dihang kalit lang kining nawad-an og brake o preno sa subida nga bahin sa gihimong road-widening project sa LGU-Tboli ngadto sa Brgy. Talcon.
Pero dimalas kay human makalukso gikan sa ga-atras nga pison, didto ra sab siya nahitugpa sa dalan diin maoy direksiyon sa wala tuyo-ang pag-atras naasoy nga heavy equipment hinungdang naligsan kini, partikular sa iyang mga tiil ug nangadugmok kini.
Dali kining gidala sa South Cotabato Provincial Hospital sa Koronadal City, apan gideklara siyang dead-on-arrival sa posibilidad nga nahutdan kini’g dugo atol sa biyahe. Rey G.Ombaña
Photos: for illustration only