Dako ang pagpasalamat ni Ladol Barangay Kapitan Abdon Blanco ngadto sa LGU Sarangani sa pag-alalay kanila gikan pa sa pagsugod nga masiak sila sa ilang mother barangay nga Barangay Poblacion sa Alabel, Sarangani Province hangtud napirmahan ni Pangulong Rodrigo Duterte ato lang nakalabay nga bulan sa Disyembre ang nasyonal nga balaod giduso ni Congressman Ruel Pacquiao, ang Republic Act No. 11599 isip ika-141 barangay sa probinsya sa Sarangani, gikan sa orihinal nga 140 barangays.
Segun ni Kapitan Blanco, gikan tuig 2019, nikabat sa P1.5 Milyon ka pesos matag tuig ang pondo sabsidiya nga ginatunol sa Kapitolyo sa Sarangani alang sa ilang mga galastuhan isip usa ka barangay.
Ila matud pang gihangyo si Governor Steve Chiongbian Solon nga dugangan ang pondo aron makalihok sila nga mga barangay official, tuod man paspas kining gi-aprobahan ni Governor Solon pinaagi usab sa legislative authorization sa mga board member sa pagpanguna ni Vice Governor Elmer De Peralta.
Gawas sa P1.5 Milyon ka pesos subsidy gikan sa Sarangani Provincial Government, aduna puy ginahatag kada tuig nga Tunga sa Milyon ka pesos (P500K) ang LGU Alabel sa pamunuan ni Mayor Nonoy Salarda.
Tuig 2012 nahimong barangay ang kanhi nga Sitio Ladol panahon ni former mayor Azon Grafilo nga karon board member sa Sarangani. Gilihok kaniadto ni former board member Eugene Alzate ang provincial ordinance aron mamugna ang Barangay Ladol, para makasugod isip usa ka barangay.
Gani, nahimong unang kapitan si the late barangay kapitan Wilfredo Suizo. Nagtabangay ang Kapitolyo ug Mayora Azon nga matagaan og pondo ang Ladol kada tuig, sa policy support sa Sangguniang Panlalawigan ug Sangguniang Bayan.
Apan maglisod sa mga gimbuhaton ang barangay council gumikan sa limitadong salapi hinungdan nga gi-rekomenda sa LGU Sarangani nga hangyuon si Congressman Ruel nga magpasa og House bill aron mamugna ang Ladol pinaagi sa republic act.
Dako ang tabang kung republic act tungod makadawat sila og IRA o Internal Revenue Allotment gikan sa nasyonal nga gobyerno, sama sa ginadawat sa regular nga barangay nga milyones ang pondo nga ginahatag gikan sa DBM-Department of Budget and Management.
Sa karon, nagpaabot na lang sila Kapitan Blanco kanus-a sila makadawat sa IRA, gitawag na karon nga NTA kon National Tax Allotment.
Gawas sa kamugnaan sa Barangay Ladol, mapasalamaton usab ang mga taga-Ladol tungod sa daghang proyekto nga naabot kanila bisan bag-o pa lang sila nga barangay. Si Governor Solon ang nangita og yuta aron kabutangan sa ilang barangay hall, pinaagi sa technical assistance sa Provincial Assessor’s Office ug Provincial Legal Office.
Pinaagi ni Senador Manny Pacquiao, napabarog ang ilang gwapo nga barangay hall. Pinaagi usab ni Congressman Ruel Pacquiao, napatindog ang ilang nindot nga barangay gymnasium.
Ang sementado nila nga kalsada gikan sa national highway ang gilihok nila Governor Solon ug Mayor Salarda, sa pagduso sa tourism office sa Kapitolyo, ang Sarangani Tourism and Investment Promotion Center (STIPC), hinungdan nga napondohan sa Department of Tourism ug DPWH tungod giila man kini nga tourism road padulong sa sikat nga Ladol Beach.
(Source: PIO-Sarangani)
