MOKABAT sa P2-Milyon ang damyos sa Molo Footbridge sa Purok Upper 2, Poblacion, Alabel Sarangani Province nga naguba gumikan sa kusog nga pagbaha kaniadtong Hulyo14.
Mibalor usab sa kantidad nga P174,000 ang damyos sa mga fishpond nga naagian sa baha, kantidad nga P140,000 ang damyos sa lapad nga kaumahan sa lugar, ug mikabat sa P100,000 ang damyos sa mga balay nga naanod.
Sumala ni Rene Punzalan labaw sa Sarangani Provincial Disaster Risk Reduction and Management Office kun PDRRMO gi-inspeksyon nila ang lugar ug nasayran nga adunay 8 ka balay ang totally damage human naagian sa baha.
Tungod niini naghimo og rehabilitation plan ang provincial government sa Sarangani nga isumite sa DSWD-12 aron mahatagan og pinansyal nga hinabang ang mga pamilyang nawad-an og balay.
Sa karon gipangitaan og relocation area ang walo ka pamilya aron sila makasugod ug makapatindog sa ilang balay.
Samtang kadtong mga residente nga wala pa makauli sa ilang mga pinuy-anan temporaryong nagtinir sa Alabel Civic Gym ug sa covered court sa Brgy. Ladol sa nasangpit sa Munisipyo.
Nahatagan na usab sila og mga food packs, gamit, ug tambal ilabi na ang mga bata ug senior citizen.
Pahimangno ni Punzalan sa mga residente sa Sarangani Province nga magbinantayon kanunay labaw na sa sunod-sunod nga pagbaha ug makigkooperar kanunay sa mga barangay opisyal aron paspas ang pagrespondi sa mga awtoridad. (Sarangani Provincial Disaster Risk Reduction and Management Office (PDRRMO)).