Sarangani, Davao Occidental – Narekober sa pwersa sa mga otoridad sa Sarangani, Davao Occidental (Balut Island) ang gikaingong mga imported nga sigarilyo gikan sa usa ka abandonadong bangka.
Nasayran nga pinaagi sa usa ka nagpakabanang tawo sa may Barangay Batuganding, Sarangani Davao Occidental ang mitawag sa kwerpo sa Balut-Island Sarangani Maritime Police Precint kalabot sa usa ka abandonadong bangka sa ilang lugar.
Tungod sa maong sumbong, gilayon nga miresponde ang mga personahe sa Balut-Island MPP, sa pagpanguna ni PMsg Roger Agodania, kauban ang mga personahe sa Sarangani Municipal Police Station, ug Task Force Seahawk Patuco alang sa pagsuta sa maong bangka.
Sa pagsuta, usa ka color puti ug green nga bangka, ug walay pangalan ang na-diskubrihan sa lugar, ug wala na’y tawo sa maong bangka.
Atol sa gihimong actual search, nasuta ang mga kinarton nga mga imported nga sigarilyo (GHUDANG BARU) nga gibana-banaang anaa sa ₱ 243,000 ang kantidad ug gituuhang gikan sa nasud Indonesia ang mga nahisgutang mga produkto.
Sa karon, ang maong bangka ang anaa sa kustodiya sa Balut-Island MPP samtang padayon pa ang ginahimong imbestigasyon kalabot sa maong gituuhang palusot nga mga produktong gikan sa ubang nasud.
(News & photo courtesy of SARANGANI MARSPTA | BALUT-ISLAND MPP)