GOVERNOR SOLON NANGUNA SA PAGSUNOG SA P8-MILYON NGA KANTIDAD SA SHABU, MARIJUANA UG EXPIRED NGA MGA TAMBAL KAUBAN ANG PDEA REGION 12, NATIONAL AWARD NGA NAG-ILA SA SARANGANI PROVINCIAL ANTI-DRUG ABUSE COUNCIL ISIP TOP 10 HIGHLY FUNCTIONAL PADAC TIBUOK PILIPINAS NADAWAT NA SA LGU SARANGANI
Bisan sa ka-busy sa kampanya niaging bulan sa Abril apan natagaan gihapon og higayon ni Governor Steve Chiongbian Solon ang imbitasyon kaniya sa kugihan nga PDEA 12 Regional Director Naravy Duquiatan, kuyog ang liderato ni PNP 12 Regional Director Brigadier General Alexander Tagum, nga mahimong guest of honor and speaker sa pinasahi nga seremonyas gitawag nga destruction ceremony. Ang maong destruction of dangerous drugs ang pagpakita sa publiko sa pagsunog sa sobra Walo ka Milyon ka pesos (P8M) nga kantidad sa shabu, mga pina-ugang dahon sa marijuana ug mga expired nga tambal giila nga regulated medicines nga tingob nakumpiska ug nakuha sa PDEA sa entiro Rehiyon Dose. Literal nga niagi og proseso sa cremation, niagi og pag-cremate ang mga nahisgutan gumikan gigamit ang mga dagkong makina sa thermal decomposition sa Monte Cielo Gardens sa may Mabuhay, Gensan aron masiguro nga maugdaw. Sa bahin ni Governor Solon, iyang gidayig ug gipasalamatan ang pamunuan ni PDEA RD Duquiatan, kaabag sila PDEA Sarangani Provincial Officer Jerome Valentos, PNP Sarangani ug kasundaluhan sa pagsiguro nga magpabilin nga drug-cleared ang halos mga barangay sa Sarangani Province.
Kauban sa Gobernador atong tungura mao si Board Member Arman Guili, ang chairman sa SP Committee on Peace and Order. Gisaad ni Congressman-elect Solon nga padayon kining mu-ayuda sa panginahanglanon sa PDEA, hilabi na sa pagpasa og mga balaudnon didto sa hawanan sa Kongreso aron mulig-on pa ang organisasyon sa pagkab-ot sa gihandum nga drug-free Philippines. Samtang, gitunol na sa DILG ug PDEA ang national award nga nag-ila sa Sarangani Provincial Anti-Drug Abuse Council isip Top 10 Highly Functional PADAC (pa-dak) sa tibuok Pilipinas.
Sila DILG Provincial Director Engr. Samuel Camaganacan ug PDEA Provincial Officer Valentos ang nagduhol sa maong national award pinaagi sa dako nga marker aron ipa-muntar sa sementado nga bungbong sa Kapitolyo sa Sarangani. Nakakuha og score nga 95 functionality points ang PADAC Sarangani sa nahitabo nga performance evaluation entiro Pilipinas.
Hinungdan nga nasulod kini sa Top 10 PADAC taliwala nga adunay otsyentay dos (82) kabuok probinsya ang nasud. Gikalipay kini pag-ayo ni Governor Solon kay sya man ang provincial chairman sa PADAC Sarangani kauban ang mga municipal mayor ug si Focal Person Lizette Lopez, sa dakong pagsuporta usab nila Vice Governor Elmer De Peralta, mga board member ug nila Senador Manny ug Congressman Ruel Pacquiao.Ang dako nga marker ang may selyo gikan sa National Anti-Drug Abuse Council Assessment Committee nga maoy nahimong hurado sa performance sa tanang LGU tibuok Pilipinas.
Naa usab kini pirma nila DILG Secretary Eduardo Año, PDEA National Director General Wilkins Villanueva ug Dangerous Drugs Board Secretary Catalino Uy. Ang nasangpit nga marker ang naukit na sa main entrance sa lobby sa Sarangani Capitol. Una nang gidayig ni PDEA National Director General Villanueva ang LGU Sarangani sa iyang pagbisita niaging tuig 2021 tungod ang probinsya sa Sarangani matud pa ang adunay pinakaubos nga na-apektuhan sa ginadiling druga itandi sa mga lugar sa Rehiyon Dose. (PIO-SARANGANI)
