General Santos City – Gipasidunggan ang Dakbayan sa General Santos sa ilang kalampusan isip Fully Compliant Local Government Unit sa 24th Gawad Kalasag National and Regional Awarding Ceremonies para sa Rehiyon 12, nga gipahigayon karong adlawa, Nobyembre 28, 2024 sa The Farm @ Carpenter Hill, Koronadal City.
Ang pasidungog personal nga gidawat ni Mayor Lorelie Geronimo Pacquiao ug City Disaster Risk Reduction and Management Officer, Dr. Bong Dacera.
Ang Gawad Kalasag usa ka prestihiyosong programa sa National Disaster Risk Reduction and Management Council (NDRRMC) nga nag-ila sa mga lokal nga kagamhanan ug organisasyon nga nakahatag ug talagsaong kontribusyon sa Disaster Risk Reduction and Management (DRRM) ug humanitarian assistance.
Ang pagkab-ot sa Fully Compliant status sa General Santos maoy pamatuod sa dedikasyon sa lokal nga kagamhanan sa pagpalig-on sa pagpangandam ug pagpanalipod sa komunidad batok sa mga katalagman.
Ubos sa pamunoan ni Mayor Lorelie Geronimo Pacquiao, nakab-ot na usab ni General Santos ang lig-ong lakang padulong sa mas luwas ug mas andam nga dakbayan. Usa ka kadaugan nga nagrepresentar sa kahago sa lokal nga gobyerno ug sa mga tawo nga nagpaluyo sa Lungsod sa General Santos. (Rem Agdon)
News&Photos: CMO