Polomolok, South Cotabato – Patay ang duha ka miyembro sa Civil Security Unit (CSU) sa LGU-Polomolok, sa nahitabong pagpamusil sa National Highway, sakop sa purok 8, Barangay Sulit Polomolok, alas 6:48 ang takna gabie, January 6, 2023.
Mga biktima mao silang si retired PNP member Bonifacio Cabisada , 58 anyos nga residente sa Purok Rañada, Barangay Poblacion, Polomolok ug Jessie Arciete, legal age, residente sa Purok Riverside, Barangay Silway 8.
Subay sa Blotter sa Polomolok PNP, nasuta nga pauli na unta ang mga biktima gikan sa Barangay Sulit sakay sa ilang Motorsiklo, pag-abot sa lugar, sila gipusil sa wala mailhing mga suspek. Gidala pa sa ospital ang duruha apan gideklarang dead on arrival.
Nasayran nga si Cabisada ang nakaangkon ug samad sa ulo samtang si Arciete nakaangkon ug ubay-ubayng samad sa lawas nga maoy hinungdan sa ilang kamatayon.
Sa pakighinabi kang Cezar Gonzaga, CSU Head sa lungsod sa Polomolok, iyang gibutyag nga sila blangko pa gyud sa motibo sa krimen gumikan wala man silay nasayran nga kalaban ang duha ka mga biktima tungod pulos buotan man ang mga nasampit.
Nasayran nga nakadawat nalang siya ug impormasyon gikan sa iyang umagad nga kuno dunay gipusil sa national highway ug dihang iyang gisuta, nakurat nalang kini tungod mga sakop diay niya ang gipamusil.
Hustisya usab ang singgit sa mga kabanay sa mga biktima. Matud sa anak sa retired police nga si Cabisada, buntag kagahapong adlawa niya uwahing nakit-an nga buhi ang iyang amahan.
Gani iyang gibutyag nga siya nagmahay nga wala siya niuli sa ilang balay kagahapon sa udto, unta nakit-an pa niya ang iyang amahan.
(Source: PDEA-12, photo credits to the owner)