General Santos: Duha ka fishing boat nasunog

0
0

General Santos City – Padayon ang gihimong imbistigasyon sa Bureau of fire Protection-Gensan bahin sa nahitabong sunog sa duha ka mga fishing boat nga nahimutang sa Amadeo Compound sa kadagatang bahin sa Barangay Tambler, Gensan, ala 1:00 ang takna sa kaganinang kaadlawon, July 21, 2022.

Visit RPN DXDX General Santos

Matud ni SFO1 Filamer Acub, Fire Investigator sa BFP-Gensan, nakadawat sila ug report nga matud pa dunay duha ka fishing boat ang nasunog sa lugar kansa gilayon nilang girespondihan. Ang maong fishing boat ang gipanag-iyahan sa pamilyang Lim.

Miabot matud pa sa duha ka oras ang ilang pakigharong sa kalayo ayha kini gideklarang fire out.

Dugang pagbutyag ni SFO1 Acub nga base sa ilang inisyal nga imbistigasyon, naggikan ang sunog sa engine room sa FB Angelita ug nadamay ang katapad niini nga light boat.

Giklaro usab ni Acub nga non-operational na ang maong mga fishing boat human gideklara sa tag-iya nga dili na gamiton.

Duha ka bulan palang dihang midunggo sa lugar ang maong mga barko ug bag-uhay palang usab midesisyon ang tag-iya nga dili na kini gamiton.

Posibleng electrical ang hinungdan sa pagkasunog sa duha ka fishing boat, apan wala usab gibalewala sa BFP-Gensan ang uban pang hinungdan sa maong sunog.

Mukabat usab sa ₱ 100,000 ang gibana-banaang damyos sa naugdaw nga duha ka fishing boat.

(Source: BFP-Gensan)

LEAVE A REPLY

Please enter your comment!
Please enter your name here