General Santos City – Himas rihas karon sa selda sa Police Station 5 ang usa ka Reymond Ayon Arquino Sr. 37 anyus nga nanimuyo sa Block-9, Purok Diamond Valley, Barangay Tambler ning syudad sa GenSan human nga masikop kini sa mga operatiba sa police station 5 tungod sa pag hupot niini ug armas nga walay dokumento ug nakuhaan pa kini ug ubay-ubayng sachet sa iligal nga droga.
Sumala pa ni Police Major Ian Bagot ang hepe sa Police Station 5 nga magsilbi unta ug warrant of arrest ang iyahang mga sakop sa maong lugar batok sa usa ka wanted sa kasong murder human nga aduna silay nadawat nga impormasyon nga anaa sa lugar ang maong suspect alas 8:00 ang takna sa gabie apan nagnegatibo ang maong operasyon.
Tungod kay wala man ang ilahang target sa maong lugar nagdisisyon ang duha ka mga intel operative sa maong estasyon nga mag pahulay ug mag meryenda sa usa ka tindahan.
Samtang nagakaon matud pa, adunay usa ka lalaki ang nipalit ug ice sa tindahan kung asa sila nagakaon ug nakita nila nga nagsiwil ang handle sa pusil nga naka sukbit sa likod sa suspect hinungdan nga ilaha unta nga sitahon.
Apan inay nga mutuman, mi-aksyon man hinuon kini ug bunlot sa iyahang pistola ug musukol unta sa kapulisan hinungdan nga gi-unhan kini sa operatiba ug gipusil sa wala nga bahin sa iyahang tiil. Nakuha sa posisyon sa suspect ang usa ka kalibre 45 nga armas duha ka magazine, ug 9 ka mga buhing bala, samtang sa pag suta sa nasangpit aron tabangan ug dalhon sa balay tambalanan nangahulog gikan sa sling bag sa nahisgutan ang mga sachet sa gituohang iligal nga droga.
Subay sa pagsuta sa kapulisan, mukabat sa 22 ka mga sachet sa gituohang shabu nag naakuha gikan sa suspek nga may market value nga 102,000 ka pesos.
Sa kasamtangan bantay sarado sa balay tambalanan ang suspect samtang, gipasa na sa crime laboratory ang armas niini alang sa ipahigayon nga ballistics examination aron masayran kung nagamit ba kini sa mga krimen sa syudad.
Gi-andam naman usab sa Police Station 5 ang tukmang kasong ipasang-at sa kapulisan batok sa suspect. (Fred Degala)