Padayon karon ang hot pursuit operation batok sa usa ka incumbent Barangay Captain nga nipusil patay sa iyang igsuon.
Sa pakighinabi ni Police Major Andy Michael Roque, ang hepe sa Argao Police Station, atol sa programang Karambolang Bisaya sa DYKC nibuyag kini nga nagpadayon ang ilang hot pursuit operation batok sa suspetsado nga kapitan.
Mahinumduman nga pasado alas 2:10 kagahapon sa kadlawon, Pebrero 28,2023 nahitabo ang pagpamusil patay didto sa Lakandula Street, Barangay Poblacion, Lungsod sa Argao Probinsya sa Sugbo .
Diin ang biktima nga manghud giila nga si Mark Anthony Villamora, 39 anyos ang panuigon, negosyanti, nagpuyo sa Barangay Lamacan sa mao ra nga lungsod.
Samtang ang igsuon nga suspetsado mao si Roberto Carillo Villamora Jr. kasamtangang kapitan sa Brgy. Panadtaran sa susamang lungsod.
Nasayran nga tungod sa duwa nga billiard maoy hinungdan sa pagpamusil patay.
Nag awhag si Roque sa suspetsado nga mutahan kini sa tinugyanan sa balaod.
Dugang sa hepe nga nanawagan siya sa publiko nga makig alayon sa kapulisan kung adunay kasayuran sa nahimutangan sa suspetsado nga kapitan. (Renante Lada)