Nagpabilin matod pang epektibo ang tubag ug kampaniya sa General Santos City government batok sa padayong bahad sa coronavirus disease 2019, bisan pa man, milampas na sa 1,000-mark ang kinatibukang ihap sa mga natakbuyan sa virus sa siyudad.
Sa usa ka pamahayag, giasoy ni City Mayor Ronnel Rivera nga bisan pa man padayon ang mga natala nga mga bagong pasyente, nagpabiling taas usab ang recovery rate sa maong mga infected patients.
Base sa November 19 tracker data sa Department of Health-Region 12, misaka na sa 1,031 ang total confirmed citywide Covid cases, asa, 168 sa mga niini ang gikonsiderang “active” o nagpabilin pa sa mga balay tambalanan.
Lakip sa mga niini ang 14 newly-reported patients nga natala sa latest case bulletin.
Samtang, gikumpirma usab sa DOH anaa na sa 823 ang total recoveries sa siyudad, human madugang ang 15 pa ka mga bagong nakarekober gikan sa virus infection.
Nagpabilin sa 40 ang Covid-19 related fatalities sa GenSan.
“Sad to say, naabot kita og 1,000 but ang atong recoveries, almost 800 naman pud. So, gagukod lang ang atong cases ug ang atong recoveries, that means, maayo ang atong responde. But of course ang target nato, mabalik sa zero, so mao nang objective sa atong City-IATF ug sa atong mga frontliners,” ang tipik sa pamahayag ni Mayor Rivera.
(Leo Marten Cellan)