General Santos City – Mangandam na ang buhatan sa Business Permit and Licensing Division aron susihon ang mga establisyemento kung nakakuha ug business permit alang sa tuig 2024.
Kini human natapos kagabie ang online registration ug renewal sa mga may negosyo sa syudad. Matud ni Christian Mark Abarquez ang labaw sa naasoy nga buhatan nga tumong sa pagsusi aron mahibaw-an kung nag comply ba ang usa ka negosyo sa gihatag nga tagal sa syudad aron makarenew sa ilang papeles.
Nagtuo si Abarquez nga dakong pabor sa mga tag-iya ug negosyo ang online registration, online renewal ug online payment tungod dili na sila magbabad sa City Hall aron magpaabot sa ilang mga papeles.
Gibutyag ni Abarquez nga sugod sa Pebrero magpahigayon ug inspection ang ilang buhatan sa mga establisyemento.
Kung makita nga wala nagrenew ila kini nga hatagan ug higayon nga makakuha ug business permit sulod sa trenta diyas apan may surcharge na nga 25 percent sa kinatibuk-ang bayrunon samtang dos porsyento nga interest matag bulan. (Jun Abelo)