Alabel Sarangani Province—Andam ang lokal nga panggamhanan sa munisipalidad sa Alabel, Sarangani Province sa pagbalhin sa LGU sa pipila katungdanan gikan sa national government, base sa Mandanas- Garcia ruling sa Korte Suprema.
Bag-o pa man miigo ang covid-19 pandemic, mipailawom na sa worshop ang mga empleyado isip pagpangandam sa devolution of power. Nagtuo si Alabel, Sarangani Province Mayor Vic Paul Salarda nga kaya nilang ipatuman ang dagkong programa ug proyekto gikan sa national. Kini tungod nabaid na sila gumikan sa mga proyekto ug programa gipatuman sa National Task Force to End Local Communist Armed Conflict (NTF-ELCAC).
Ang NTF-ELCAC ang gimugnang task force sa gobyerno aron tubagon ugat- hinungdan sa communist rebellion sa pilipinas. Dugang ni salarda, sa karon naa sa P300 milyon ang national tax allotment nila ug kinatibuk-ang P400 milyon ang income sa munisipyo. Ang Alabel ang dunay 95,000 populasyon gikan sa 14 ka barangay ug kini ang sulod sa kategoryang first class municipality.
Kahibaloan nga gimandu ni Pangulong Ferdinand Marcos Jr., Sa Department of Budget and Management (DBM) nga tun-an og maayo kung kayahon na sa mga LGU ang pagpatuman sa ruling. Gipalig-on sa Executive Order (EO) 138 ang pagpatuman sa Supreme Court ruling sa kasong Mandanas- Garcia nga tumong palig-onon ang awtonomiya ug paghatag og gahum sa mga LGU.
Dunay hangtud 2024 ang transition alang sa pagbalhin sa katungdanan o devolution of powers sa executive branch sa LGU. Lakip sa serbisyo mao ang pagpatuman sa programa sa panglawas, pang- agrikultura, imprastraktura ug turismo.