General Santos City – Gidayeg ni Gensan City Mayor Lorelie Pacquiao ang kapulisan sa dakbayan sa pagpanguna ni police col. Jomar Alexis Yap, Acting City Director sa General Santos City Police Office (GSCPO) atol sa 100 days report niini gumikan sa ilahang accomplishment ilalom sa pagdumala niini isip mayor.
Sumala niya nga kanunay ang suporta sa lokal nga panggamhanan ngadto sa kapulisan ug militar ug andam siya nga ihatag ang unsa mang gikinahanglan sa kapulisan ug militar aron nga makatabang sa ilang trabaho.
Pamahayag niya nga ang pagbantay sa siguridad partikular na ang pagpabilin sa kalinaw sa syudad ang muresulta sa paglambo sa ekonomiya sa kinatibuk-an.
Gihagit usab ni Mayor Pacquiao ang kapulisan ug militar dungan sa suporta sa lokal nga panggamhanan nga doblehon ang pagbantay sa siguridad gumikan nagadako ang syudad ug nagkadaghan ang mga krimen nga posibleng mahitabo.
Dako matud pa ang pagsalig sa lokal nga panggamhanan ngadto sa kapulisan ug militar sa pagbantay sa siguridad kung asa anaa usab ang pagsalig sa tanang sektor ngadto kanila. Pag-angkon niya nga hagit alang sa otoridad ang paghimo sa ilahang tahas hilabina sa usa ka highly urbanized city.
Nauna na usab nga nakigpulong ang LGU Gensan ngadto sa tanang defense group aron mas mapakusgan ang intelligence monitoring sulod ug gawas sa dakbayan.
(Source: LGU Gensan Facebook page)