Alabel Sarangani Province – Nag – Negatibo gayud ang resulta sa gipahigayong “drug test” alang sa 83 ka konduktor, dispatcher, ug driver nga myembro sa ALTRANSMULCO sa gipahigayong sopresa nga drug testing activity nga ginganlan og OPLAN: “HARABAS” nga gipangunahan sa Philippine Drug Enforcement Agency (PDEA), DOTr- Land Transportation Office ug sa kooperasyon sa Lokal nga Panggamhanan sa Alabel niadtong adlawng Biyernes, Abril 25, 2025 sa Alabel Transportation Terminal, Purok Tagumpay, Barangay Poblacion, Alabel, Sarangani Province.
Sumala pa sa Municipal Mayor’s Office sa Alabel, nga naangkon sa maong aktibidad ang 100 per cent nga target sa drug test.
Mapasalamaton ang Lokal nga Panggamhanan sa Alabel sa kooperasyon sa ALTRANSMULCO ingon man sa nagkalain-laing ahensya sa nasudnon nga gobyerno alang sa maong aktibidad nga nagtumong nga masiguro nga luwas sa kanunay ang pagbyahe sa publiko.
Kabahin matud pa kini sa programa subay sa kampanya batuk ilegal nga droga ug ang pagmintinar sa kalinaw ug kahapsay sa komunidad.
News&Photos: MIO-ALABEL