General Santos City – Patay ang usa ka 8 years old nga batang lalaki human aksidenteng napusilan sa iyang kaugalingong amahan ala 1:00 ang takna kaganinang kaadlawon samtang kini natulog sulod mismo sa ilang panimalay sa Sitio Vicente, Barangay Centrala, South Cotabato.
Giila ni Police Lt. Col. Jorome Sentinta, Chief Of police sa Surallah PNP ang suspek nga si Edwin Castillo Abajay, 42 anyos, mag-uuma ug residente sa maong lugar.
Segun ni Police Lt. Col. Sentinta, subay sa ilang initial investigation nasayran nga ayha nahitabo ang insidente, nakig-inum matud pa ang suspek sa iyang mga barkada. Human sa inum, gitawgan sa suspek ang iyang asawa sa abroad apan dili niini ma-contact.
Gikaingong una nang nagduda matud pa ang suspek nga dunay lain ang iyang asawa. Gumikan sa tumang kadismaya, gikuha niini ang iyang pusil aron sa pagsuway ug hikog apan dihang iyang gikablit ang gatilyo ang nawong sa iyang anak maoy naigo.
Nakaangkon ug samad ang biktima sa iyang nawong nga milapos sa iyang dunggan. Gidali pag dala sa ospital ang biktima apan gideklara kining dead on arrival.
Gilayon usab nga nagpahigayon ug hot pursuit operation ang kapulisan diin ilang naabtan ang suspek sa merkado publiko sa lungsod nga nagbaktas ug nagkadugo. Gilayon usab kining gisikop ug gibalhog sa prisuhan.
Dugang pagbutyag ni Lt. Col. Sentinta nga subay sa ilang pakighinabi sa suspek, iyang giangkon ang iyang sala apan giklaro niini nga wala niya tuyua nga ang iyang anak maoy maigo sa bala nga alang unta kaniya.
Kasong parricide ang atubangon sa suspek kansa pabiling balhog karon sa silda sa Surallah PNP. (John Rey Somido)
