GENERAL SANTOS CITY – IGO na lang sa pagbakho ang usa ka ginang samtang ginaapongan ang nasunog niini nga mga gamit sulod sa iyahang gi-arkilahan nga boarding house sa Talisay Street, Balite, Barangay Lagao, Gensan. Nahitabo ang sunog pasado alas dyes sa gabie, Disyembre 14 ning tuiga. Matud pa sa ginang nga si Juliet Planas nagsugod ang kalayo sa gidagkotan niini nga kandila tungod naputlan sila og kuryente.
Nakatulog matud pa siya dihang namat-an nga nagsiga na ang kalayo sa ilahang kusina. Lakip ang tag-iya sa boardinghouse nga si Luciliata Macorol natugaw sa iyahang pagkatulog human misinggit matud pa si Juliet kay nangayo og tabang. Swerte sab nga naluwas niini ang iyahang mga anak nga nahinanok sa pagkatulog ug paspas silang nakagawas pinaagi sa tabang sa mga silingan. Ang mga personahe sa BFP nga miresponde sa lugar nagpahinomdom kang juliet nga likayan ang pagbilin sa gisindihang kandila, tungod kini ang sagad hinungdan sa mga sunog. Ginasuta pa sa BFP ang damyos sa sunog, ug kung unsa ang tabang nga mahatag ngadto sa nasunogan. (Jun Abelo)