Gipadayag sa kagamhanang lokal sa Cagayan de Oro, pinaagi sa buhatan sa Oro Trade and Investment Promotions Center (ORO-TIPC), ang suporta ngadto sa mga sakop sa Food Processors’ Association of Norther Mindanao (FOPANORMIN) atol sa usab sa pagpanumpa sa mga bag-ong opisyales sa FOPANORMIN sa pagpangulo ni Craig Mari Padla, Hunyo 8 ning tuig.
Gisiguro ni ORO-TIPC Department Manager John W. Asuncion nga ang kagamhanang lokal sa syudad ubos sa administrasyon ni Mayor Rolando Klarex Uy, andam kanunay nga motabang sa paglambo sa food processing industry pinaagi sa pagtambayayongay sa uban pang mga ahensya sa gobyerno.
Dumdoman nga nahisukip sa economic recovery ubos sa RISE agenda ni Mayor Klarex ang pagtabang sa mga micro, small and medium enterprises ilabina kadtong mga labihang naapektuhan sa pandemya.
Samtang, mismo si Department of Trade and Industry Misamis Oriental Provincial Director Almer Masilliones ang mihurar sa mga bag-ong FOPANORMIN officials diin gisaksihan sa mga myembro ingonman sa mga nagkadaiyang ahensya sama sa Department of Labor and Employment, Department of Agriculture, University of Science and Technology, Department of Tourism.
Lakip misaksi sa maong kalihukan si City Information Officer Ms. Ivy Guatero ug si Engineer Romela Ratilla, regional director sa Department of Science and Technology.
(News and photo courtesy of CIO CDO)