Si Albay Governor Atty. Edcel Grex Lagman mahagad nin sarong special session sa Sangguninang Panlalawigan kan Albay para pag-urulayan an pagpasar nin resolusyon na madeklara sa probinsya nin Albay na isairarom nin State of Calamity huli sa pag-alburuto kan Bulkan Mayon.
Sa ginibong emergency meeting preparedness and response kasu-udma sa provincial capitol kan Albay kaibahan an mga respresentante kan kanya-kanyang lokal na gobyerno, mga ahensiya asin departamento, sinabi ni Lagman na dapat na maipairarom sa state of calamity an Albay para magamit an camality fund kan probinsya magin sa mga LGU para maidagdag sa 30 milyon pesos na iaalokar na pondo para sa manlain-lain na pangangaipo lalo na sa pag-evakwar kan mga apektadong residente.
Sa ibong kaini nagpahayag man nin kasiguruhan an Department of Social Welfare and Development (DSWD) Bicol kun hain may inisyal ng 50,000 na mga family food packs an preparado mantang piglalaoman man na madudugangan pa ini.
Sinabi man kan Department of Education Albay Division na preparado man an mga classroom enkaso kaipuhan pa ninda ining inspeksyonon para masiguro na may kuryente, tubig asin sanitasyon. (Jv Navarro Verdeflor Jr.)
(Source: Provincial Government of Albay, photo credits to the owner)