Giandam na sa local nga kagamhanan sa syudad sa Cagayan de Oro ug City Social Welfare and Development ang food assistance alang sa mga hilabihang naapektuhan nga sector sa katawhan dinhi sa dakbayan. Ang maong food packs gilangkoban sa 15 ka kilong bugas, 15 ka noodles, 5 ka sardinas, 5 ka corned beef ug 5 ka beef loaf nga dunay budget dul-an usa ka libo matag food pack.
Prayoridad sa CSWD ang mga sector nga walay hinabang gikan sa nasudnong ahensya sama na lang sa mga anaa sa trasportasyon ilabi na sa mga drivers sa public utility jeepneys, taxis, public utility vans, coasters, buses, motorela, trisikad ug habal-habal ingon man ang vulnerable sectors sama sa fishermen, farmers, scavengers, street families, ambulant vendors, ug kadtong mga graduate sa Community Improvement Division apil na ang massage therapists base sa rekomendasyon sa chairman sa barangay.
Giklaro sa CSWD nga ang mga miyembro sa Pantawid Pamilyang Pilipio Program o 4Ps beneficiaries ug unconditional cash transfer programs apil ang mga minimum wage workers dili apil nga matunulan sa maong food assistance sa syudad. Ang mga senior citizens sa pikas bahin ang hatagan sa ilang local pension nga house to house ang paghatud nga mokabat sa tag P3,000-P6,000 matag usa.