Mokabat sa P550 milyones ang gipaabot nga aprobahang gahin sa konseho sa syudad ubos ni bise mayor Kikang Uy aron magamit pagtubag sa mga panginahanglanon pagpakgang pagkaylap sa coronavirus disease o Covid-19. Kini human si Mayor Oscar Moreno misubmitir sa konseho sa supplemental Budget No. 1 sa General Fund sa kasamtangang tuig 2020 aron mauyunan sa konseho sa daling panahon.
Ang maong gahin gisugyot nga gamiton alang sa i-apod apod nga ayudang pinansyal sa mga molupyo sa syudad ug mga mamumuo nga nawagtangan sa ilang panginabuhian gumikan sa Covid-19. Apil usab nga gigahinan sa maong pundo ang pagpalit sa mga gikinahanglang ekipo nga magamit sa Covid-19 response team sama sa mga anaa sa border checkpoints, sanitation team nga nanglimpyo sa kadalanan ug uban pang mga pampublikong lugar sa tinguha nga mahingusgan pa ang kampanya batok sa pagkaylap sa maong virus.
Ang pundo nga gamiton alang sa maong katuyuan kuhaon gikan sa pundo sa infrastructure Projects/ Programs balor 200 milyones ug dugang P300 milyones sa kasamtangang appropriations gikan sa Economic Sector balor P300 milyones.