Magpatuman og mas gipahugtan nga border control ang probinsya sa Sarangani sugod karong Sabado, Mayo 8, hangtud Mayo 31, ning kasamtangang tuig kung diin bugtong essential travel kon labing importanteng katuyuan lang sa pagbyahe ang tugutan. Kini ang nahimong unod sa Executive Order No. 16 nga gipagawas ni Governor Steve Chiongbian Solon.
Panagana ang nahimong aksyon sa LGU Sarangani kauban ang pito (7) ka mayor tungod sa maka-alarma nga pagsaka sa ihap sa mga natakbuyan sa Coronavirus sa entiro Rehiyon Dose. Gani, una nang nagpatuman og border restriction ang dakbayan sa Heneral Santos ug lalawigan sa South Cotabato.
Setentay uno (71) na karon ang aktibong kaso sa Sarangani Province as of May 5. Segun ni Governor Solon, walay problema kung pila ang mag-positibo, ang importante matud pa ma-swab test ang tanang suspected case ug mga direct contact aron paspas ma-isolate, matambalan ug dili na kini makapanakod pa sa uban. Kana matud pa ang ilang lihukon hangtud Mayo 31.
Sa maong Executive Order No. 16 ni Governor Solon, gitugutan lang makasulod ug gawas sa Sarangani Province ang pagbyahe tungod sa ilang mga trabaho, kadtong buot makabaton og mga goods and services – mga pagkaon ug panginahanglanon sa panginabuhian – pag-angkon og serbisyong medikal, ug uban pang importanteng tuyo nga gi-uyunan sa inter-agency task force.
Magpakita lang og mga papeles sa checkpoint, sama sa task force ID, ID sa opisina o kumpanya, medical referral ug uban pang balidong dokyumento magpatuod nga importante ang lakaw. Ipakita usab ang mga QR code sa border entry.
Gibawalan usa ang mga dili taga-Sarangani nga makasulod sa mga tourism destination sa probinsya hangtud Mayo 31. Nagpabilin ang rekositos nga negatibong RT-PCR swab test result gikan sa mga lugar nga daghan pa ang gipang-COVID. (Provincial Information Office – Sarangani)