Enhanced Document Tracking System (EDTS) Gipatuman Sa Kapitolyo Probinsyal

Dugay na nga hagit sa Kapitolyo Probinsyal ang pag-monitor sa gatusan ka mga dokumento ug papeles nga gipadagan sa mga nagkalain-lain nga mga departamento ug opisina matag adlaw.

Gumikan niini, gimando ni Gobernador Bambi Emano pinaagi ni Provincial Administrator Atty. Jocelyn Lood-Mateo nga tapukon ang mga IT personnel sa Kapitolyo aron gamiton ang ilang kahanas sa pag-modernize sa karaan na nga Document Tracking System (DTS) nga gigamit sa Kapitolyo.​

Human sa duha ka bulan nga kolaborasyon sa mga IT personnel gikan sa Misamis Oriental Provincial Internal Audit Department (MOPIAD), Management Information System (MIS), Provincial General Services Office (PGSO), Provincial Budget Office (PBO), ug Assistant Provincial Administrator’s Office (APA),

malampuson nga gipahigayon niadtong Mayo 27, 2021 ang dry-run sa Enhanced Document Tracking System (EDTS) nga gitambungan sa tanan nga mga Administrative Officers ug Receiving Clerks sa matag departamento ug opisina sa Kapitolyo apil sa mga Provincial Hospitals.

Human sa dry-run, malampuson nga gipasiugdahan niadtong Mayo 31, 2021 ang Enhanced Document Tracking System (EDTS).

Gawas sa gipa-ayo ug paspas nga sistema, mas gipasayon ang pagamit sa EDTS tungod kay pinaagi lamang sa pag-scan sa QR code nga i-generate niini gamit ang mobile phone o portable scanner, daling makita ug masunod kung asa na ang mga gipadagan nga dokumento.

Dugang niini, ang mga memorandum orders ug lain-laing sulat sa komunikasyon gikan opisina sa Gobernador ug gikan sa opisina sa Provincial Administrator karon mahimo na sa digital nga aron paspas nga madawat sa tanang empleyado.

Karon panahona nga ang katawhan dako na og pagsalig sa digital nga sistema bout ni Gobernador Bambi nga dili mabiyaan ug makapangita sa pamaagi aron magamit ang teknolohiya ug masiguro nga mahatagan og labing maayong pag-alagad ang tanang Misamisnon.

Pinaagi sa EDTS nga paspas ang pag-monitor sa mga dokumento gisiguro ni Gobernador Bambi nga mapadali ug mapaspasan pa ang paghatag serbisyo ngadto sa katawhan sa lalawigan.
(Jebsen D. Patlunag, PIO)