Cebu City – Moabot ug 76 ka mga panimalay sa Barangay Ibo Syudad sa Lapu-Lapu ang nag utaw-utaw na karon sa kadagatan human gibanlas sa kusog kaayo nga balod nga dala sa bagsik nga bagyong Vicky kaganinang tungang gabii.
Kini ang gibutyag ni Lapu-Lapu City Mayor Junard Chan sa iyahang Facebook post sayo karong buntag, Sabado December 19, 2020.
Matod ni Chan nga kasamtangan nga nagpasilong karon sa Ibo Elementary School ang mokabat 291 ka mga indibidwal kansang mga panimalay hingpit nga nanga guba.
Gipahibaw sa mayor nga wala ra hinooy nanga angol sa maong hitabo, tungod kay matod pa, paspas ang pag responde sa sakop sa Disaster Risk Reduction Management Office o ang Emergency Team.
Gipasalig niini nga sa mga adlaw nga magpabilin sila sa evacuation center isiguro nga ma atiman ang tanan.
Duna nay mga banig gipang hatud aron ilang mahigdaan, food packs ug non-food items.
Alang ni Chan nga dili lalim ang nahiaguman sa mga apektadong pamilya.
Gipahinumduman sa mayor kadtong uban nga nagpoyo dool sa baybayon sama sa nahitabo sa Ibo, nga dili luwas ang nahimutangan sa ilang mga panimalay karon labi na nga kung mo kusog ang hangin.
Gisiguro sab niini nga mapaspas ang social housing project sa Barangay Canjulao, tungod kay matod pa, prayoridad sila nga mabalhin aron dili mabutang sa alanganin ang ilang kinabuhi. (Jhon Tadlip/JTY, photo courtesy by Anthony Cuizon Ybanez | Anthony Redulla Caballero)
(Source: Junard Chan Facebook account)
